Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 329 Hüküm no: 506 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketleri görülen Varilci Kostantin v. Yorgo’nun esnaflıktan çıkarılmasının istendiği Derûn-ı i‘lâmda ismi mersûm Kostantin zimmînin harekât-ı nâ-marziyyeden mübâ‘adet ve fîmâ-ba‘d kendi hâliyle iştigāle ta‘ahhüdünü esnâf-ı mersûme ihbâr ve bin iki yüz yirmi iki senesi Rebî‘ülevvel’in altıncı günü tarihiyle i‘lâm olunduğu bu mahalle şerh verildi. Âsitâne-i aliyye ve bilâd-ı selâsede kâin varilci esnâfının kethüdâları Panayot v. Yani ve yiğitbaşıları Nikola v. Mina ve çavuşları İsmail ve müsinn ü ihtiyâr ustalarından Todori ve Yorgi ve Andon ve Kiryako ve Zakar ve diğer Todori ve Luizi ve Marko ve Yorgo ve İstemat ve âhar Todori ve Yani ve İstefan ve sâirleri Galata Bâb Mahkemesi’nde meclis-i şer‘-i münîrde esnâf-ı merkūme ustalarından Kostantin v. Yorgo nâm zimmî muvâcehesinde herbiri takrîr-i kelâm ve tâ‘bir ani’l-merâm edip mersûm Kostantin zimmî esnâfımızdan olup lâkin kendi hâlinde kisbi ile meşgūl olmayıp mâ-takaddemden beri Tersâne-i âmire ve mahall-i sâire için inşâsı iktizâ eden fıçı ve varili esnâfımız beyninde tevzî‘an inşâ ve vakt ü zamânıyla mahalline teslîm nizâm-ı kadîmimizden iken mersûm Kostantin zimmî ber-vech-i muharrer kendiye tevzî‘ olunan mikdârı inşâ ve tasnî‘den imtinâ‘ eylediğinden mâ‘adâ sagīr ve kebîrimize itâle-i lisân ve herbirimizi âhara gamz ve iğfâl-birle tecrîm ve tekdîrden hâlî olmayıp her bir dükkâna merbût olunan bakkāl ve tuzlayıcı ve sâirinin ta‘mîr ve tecdîd olunan varil ve fıçısına âhar dükkân ustası müdâhale etmemek beynimizde cârî şürût-ı nizâmımızdan iken mersûm Kostantin zimmî İstanbul hısnı ebvâbından Cebeali kapısı hâricinde mütemekkin olduğu bir bâb varilci dükkânına kadîmden merbûta olan esnâfın isti‘mâl eyledikleri varil ve fıçılarını ta‘mîre adem-i kanâ‘atden nâşî ihtiyâr ustalarımızdan işbu hâzır bi’l-meclis Andon v. Nikola zimmînin Kapan-ı dakīk kapısı hâricinde mütemekkin olduğu bir bâb varilci dükkânına merbûta olan dekâkîne ta‘arruz ve ol vechile beynimizde cârî olan şarta ve nizâmımızın izmihlâline ictisâr etmekle esnâf beyninde kendiye tenbîh ve tekîd olundukda mütenebbih olmadığından başka ef‘âl-i sâbıkāsında ikdâm üzere olmağın mersûm Kostantin zimmînin evzâ‘ ve etvârından hoşnûd ve râzı değilleriz deyü bi’l-muvâcehe teşekkî ve esnâf-ı merkūmdan tard u teb‘îd olunmak bâbında fermân-ı âlîleri sudûrunu bi-ecmâ‘ihim istirhâm eyledikleri tescîl ve huzûr-ı âlîlerine i‘lâm olundu. Fî 9 Ra sene 1221.