Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 330 Hüküm no: 507 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fermeneci esnafından Aci Yorgi, Kabzımal Aci Tarandafil ve Yanako’nun yanan Lonca Odası’nı orta malından aslına uygun şekilde yeniden yapmaya söz verdikleri Mahrûse-i Galata hısnı ebvâbından Balıkpazarı Kapısı hâricinde Fermeneciler sükûnda mütemekkin fermeneci esnâfının ustabaşıları Aci Yorgi v. Kostantin ve kâbız-ı mâlları Aci Tarandafil v. Pavli ve Yanako v. Anastaş nâm zimmîler mahrûse-i mezbûrede mahfil-i kazâda zikri câ’î altmış kıt‘a fermeneci dekâkîni derûnlarında mevcûde gedik tâ‘bir olunur âlât-ı ma‘lûmenin mâlikleri fermeneci ustaları hâzır oldukları hâlde herbiri takrîr-i kelâm edip bir mahâll-i merkūmda kâin dekâkîn-i merkūmede mütemekkin fermeneci esnâfından olup bi-emri’llâhi te‘âlâ bu esnâda vukū‘ bulan harîkde dekâkînlerimiz muhterik olmağla dekâkîn-i merkūmeyi vaz‘-ı kadîmi ve hey’et-i asliyyesi üzere herbirimiz binâya mübâşeret etmişidik lâkin kā‘ide-i esnâf üzere Lonca Odası tâ‘bir olunur cidâr-ı hısna muttasıl esnâfımıza mahsûs odayı esnâfımızdan hâzirûn-ı mesfûrûnun ittifâklarıyla orta mâlından vaz‘-ı kadîmi ve hey’et-i asliyyesi üzere kimesneye zarar-ı şer‘îsi olmaksızın binâya ta‘ahhüd eylediğimizde hâzirûn-ı mersûmûn dahi râzı olup bu vechile beynimizde kavl ü ittifâk eyledik deyü ikrâr ve tasdîkleri bi’[l]-iltimâs huzûr-ı âlîlerine i‘lâm olundu. Fî 3 Ra sene 1221.