Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 330 Hüküm no: 508 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mahmud’un kiracısı olduğu yanmış mahzeni yeniden inşa edip yaptığı masrafla alakalı olarak mahzenin mutasarrıfı Ayşe bt. Abdullah’ın zimmetini ibra ettiği Mahrûse-i Galata’da Kemankeş Karamustafapaşa Mahallesi’nde vâki‘ etrâf-ı erba‘adan Hasan Ağa ve Mehmed Salih Ağa mahzenleri ve Necibe Hatun’un menzil arsası ve tarîk-i âm ile mahdûd bir bâb ahşâbdan yağcı mahzeninin gedik tâ‘bir olunur âlât-ı lâzıme-i ma‘lûmesine mâlik olan yağcı esnâfından Molla Mahmud b. Zekeriya nâm kimesne meclis-i şer‘-i şerîf-i enverde mahrûse-i mezbûre hâricinde Müeyyedzâde Mahallesi’nde sâkine râfi‘atü hâzihî’l-vesîka Âişe bt. Abdullah nâm hatunun zevci ve tarafından husûs-ı âti’z-zikri tasdîka vekîl olduğu zât-ı mezbûreyi bi’l-mu‘arrefeti’ş-şer‘iyye ârifân Süleyman Reis b. Osman ve Molla İsmail b. Hasan nâm kimesneler şehâdetleriyle sâbit olan Kalyoncu el-Hâc Abdurrahman b. Ali nâm kimesne mahzarında ikrâr ve takrîr-i kelâm edip mahzen-i mezkûr bu esnâda bi-kazâillâhi te‘âlâ harîkde muhterik olup ben mahzen-i mezkûrun binâsına mâlımdan teberru‘an li’l-vakf harc u sarf eylediğim yedi yüz elli guruşa müte‘allika da‘vâdan müvekkile-i mezbûre Âişe Hatun’un zimmetini kabûlü hâvî ibrâ ve iskāt eylediğimde müvekkile-i mezbûre Âişe Hatun dahi mahzen-i mezkûru târih-i vesîkadan beher şehr onar guruşa bana îcâr ve teslîm eyledikde ben dahi istîcâr ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 Ra sene 1221.