Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 335 Hüküm no: 518 Orijinal metin no: [51a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Zeyneb Hatun’un havaleden Kalyoncu Seyyid Mustafa’dan üç yüz on beş guruş alacağı olduğu Galata’ya muzâfe kasaba-i Kasımpaşa’da Tahtakadı Mahallesi’nde sâkine mu‘arrefetü’z-zât Şerife Zeyneb bt. es-Seyyid İbrahim nâm hatun Galata Bab Mahkemesi’nde meclis-i şer‘de Kalyoncu es-Seyyid Mustafa b. es-Seyyid Yusuf nâm kimesne muvâcehesinde benim mezbûr es-Seyyid Mustafa’nın zevcesi işbu hâzıra bi’l-meclis Nefîse bt. Mehmed nâm hatun zimmetinde bâ-i‘lâm-ı şer‘î mahkûmün-bih üç yüz doksan guruşdan bâkī üç yüz on beş guruş alacak hakkım olup medyûnum mezbûre Nefîse Hatun deyn-i mezkûreyi kabûl edip ol vechile cihet-i havâleden mezbûr es-Seyyid Mustafa zimmetinde meblağ-ı bâkī-i mezkûr üç yüz on beş guruş alacak hakkım olmağla hâlâ taleb ederim deyü ba‘de’d-da‘vâ ve’l-ikrâr mûcebince meblağ-ı bâkī-i mezkûr üç yüz on beş guruşu müdde‘iye-i mezbûre Şerife Zeyneb Hatun’a edâ ve teslîme mezbûr es-Seyyid Mustafa’ya tenbîh olunduğu bi’[l]-iltimâs huzûr-ı âlîlerine i‘lâm olundu. Fî 11 Ra sene 1221.