Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 337 Hüküm no: 522 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Zakari’nin arak bedelinden Kostantin v. Yani’den altmış dokuz guruş alacağı olduğu Şerbetçi Zakari v. Yelharon nâm zimmî Galata Bâb Mahkemesi’nde meclis-i şer‘de Kostantin v. Yani nâm zimmî muvâcehesinde mersûm Kostantin zimmî zimmetinde iki yüz elli vakıyye arak semeninden alacak hakkım olan yüz altmış iki buçuk guruşdan bâkī altmış dokuz buçuk guruşu bana vermemekle hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin meblağ-ı bâkī-i mezkûru dahi tamamen kendiye edâ ve teslîm etmişidim deyü ba‘de’d-def‘ ve’l-inkâr dâfi‘-i mersûm Kostantin zimmî def‘-i mezkûruna ikāmet-i beyyine edemeyip bi’t-taleb müdde‘î-i mesfûr Zakari zimmî ba‘de’t-tahlîfü’ş-şer‘î mûcebince meblağ-ı bâkī-i mezkûr altmış dokuz guruş müdde‘î-i mesfûr Zakari zimmîye edâ ve teslîme mersûm Kostantin zimmîye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 19 Ra sene 1221.