Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 343 Hüküm no: 532 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkçı Hüseyin Beşe, Seyyid Ali ve Yani’nin çıkan fırtınadan dolayı kayıklarının kırılmasına sebep olan sefînelerin reisleri Seyyid Osman, Abdullah, Katrin ve Aleksandri aleyhine açtıkları tazminat davasının meşru olmadığı Galata Balıkpazarı İskelesi kayıkçılarından Hüseyin Beşe b. Ali ve es-Seyyid Ali b. es-Seyyid Ahmed nâm kimesneler ile Yani v. Yakomi nâm zimmî Galata Bâb Mahkemesi’nde meclis-i şer‘de beş çifte tâ‘bir olunur sefîne reislerinden es-Seyyid Osman ve Abdullah b. Halil nâm kimesneler ile Katrin v. Dimitri ve Aleksandri v. Kostantin nâm zimmîler muvâcehelerinde bizim üç aded piyâde tâ‘bir olunur kayıklarımızı iskele-i merkūmede merbût iken merkūmûnun dört kıt‘a sefîneleri dahi iskele-i merkūmede merbût iken târih-i i‘lâm günü bi-emri’llâhi te‘âlâ şiddet-i fırtına zuhûr edip merkūmûnun aslâ sun‘ları yoğiken râkib oldukları sefâin-i merkūmeler bizim kayıklarımızı sıkdırıp sarf [halâs] mümkün olmayıp zikrolunan kayıkların ba‘zı mahalleri şikest olmağla mezbûrûn sefâin-i merkūmelerin reisleri olduklarına binâen zikrolunan kayıklarımızın noksan kıymetlerini mezbûrûndan tazmîn taleb ederim deyü tasaddî eyledikleri da‘vâları takrîr-i meşrûhları üzere meşrû‘a olmayıp rüesâ-yı merkūmuna bî-vech mu‘ârazadan men‘ olundukları bi’t-temessük huzûr-ı âlîlerine i‘lâm olundu. Fî 27 Za sene 1221.