Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 345 Hüküm no: 537 Orijinal metin no: [53a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanferoğlu Hoce Simyon’un Sofyalıoğlu Abraham’dan beş yüz yetmiş beş guruş alacağı olduğu Sâhib-i arzuhâl Tanferoğlu Hoce Simyon’un Galata’da mutavattın derûn-ı arzuhâlde mersûmü’l-ism Sofyalıoğlu Abraham ile beynlerinde cârî ahz u i‘tânın ber-vech-i hakkāniyet rü’yeti bâ-fermân-ı âlî Darbhâne-i âmire nâzırı izzetlü Ebûbekir Efendi tarafına havâle olundukda mersûm Tanferoğlu Hoce Simyon’un mesfûr Sofyalıoğlu Abraham zimmetinde Ermeniyyü’l-ibâre bir kıt‘a temessük ve bir kıt‘a tahvîl nâtık olduğu üzere cihet-i karzdan 31.800 guruş ve ber-vech-i âtî menzil icâresinden dahi şehriye üç yüz guruşdan mersûm Abraham zimmetinde müctemi‘ 9.200 guruş ki cem‘an 41.000 guruş alacak hakkı olduğu ve deyn-i merkūm mukābelesinde Galata’da Bereketzâde Mahallesi’nde vâki‘ lede’l-ahâlî ve’l-cîrân ma‘lûmü’l-hudûd Defterdâr-ı esbak merhûm İbrahim Paşa Vakfı’ndan bi’l-icâreteyn mutasarrıf olduğu menzilini bâ-re’y-i mütevellî dâyin-i mersûm Hoce Simyon’a 1201 senesi Rebî‘ülâhiri evâhirinde vefâen fâriğ oldukda mersûm Abraham ferağ-ı mezkûr tarihinden altı ( ) mürûrunda deyn-i merkūmu edâ müyesser olmazsa menzil-i mezkûru sûk-ı sultânîde lede’l-müzâyede ve inkıtâ‘ı’r-rağbe bedel-i misliyle âhara ferağ ve bedeli deyn-i mezkûra mahsûben kabzına “küllemâ azeltüke fe-ente vekîlî” mazmûnu üzere azl ve in‘izâlden masûn ve taleb-i akdde meşrûta vekâlet-i devriyye ile tarafından mersûm Hoce Simyon’u vekîl nasb ü ta‘yîn ve mersûm Simyon dahi vekâlet-i merkūmeyi kabûl eylediği nâzır-ı mûmâ-ileyhin Darbhâne-i âmire’de me’mûren akd eylediği meclisde taraflar kethüdâsı ve ahz u i‘tâ umûruna vâkıf ve mu‘temed bî-garaz erbâb-ı vukūf hâzır olduğu hâlde lede’l-münâza‘a ve’l-muhâsama mersûm Abraham’ın ikrârıyla zâhir olup lâkin mersûm Abraham bizim hesâbımızda sehv ve galat vâki‘ olmağla tekrar muhâsebe görelim dedikde sarraflar yedine i‘tâ buyrulan emr-i âlî mefhûmunda bu misillü sened-i kaviye rabt olunan mevâddın tekrar muhâsebesini rü’yet bâ-hatt-ı hümâyûn memnû‘ idüğün medyûn-ı mersûm Abraham’a tefhîm-birle meblağ-ı mecmû‘-ı merkūm 41.000 guruşu mersûm Abraham’dan tahsîl ve dâyin-i mesfûr Hoce Simyon’a teslîm olunmak iktizâ eylediğini nâzır-ı mûmâ-ileyh efendi dâ‘îleri i‘lâm eyledikde i‘lâm-ı mezkûr bâlâsına dahi mûcebince edâ-yı deyn ile kat‘-ı nizâ‘ olunmak deyü musahhah emr-i âlî keşîde buyrulmuş olup el-hâletü hâzihî imrâr-ı vakt ile bir akçe tahsîl ve teslîm olunmadığını dâyin-i mersûm Simyon işbu arzuhâle merbût diğer arzuhâl ile inhâ ve âhar vechile tediye mümkün olmadığı ecilden menzil-i mezkûr bedel-i misliyle âhara ferağ olunması bâbında fermân-ı âlî [53b] sudûrunu istirhâm eyledikde mesfûr Simyon’un istid‘âsına müsâ‘ade-i aliyye erzânî buyrulup menzil-i merkūm bedel-i misliyle âhara ferağ ve bedelinden deyn-i merkūm tediye oluna deyü bâlâsı sahh-ı mekârim-semûhla muvaşşah abd-i dâ‘îlerine hitâben sâdır olan fermân-ı âlîye imtisâlen menzil-i mezkûr münâdî es-Seyyid Mustafa yediyle lede’l-müzâyede ve inkıtâ‘ı’r-rağbe el-yevm bedel-i misli olan 35.250 guruş sarraf tâifesinden Agop zimmî üzerinde karâr-dâde olunup ziyâde ile tâlib-i âharı olmadığı bi’l-ihbâr zâhir oldukdan sonra mersûm Tanferoğlu Simyon v. Kirkor Galata’da mahfil-i kazâda Sarraf mesfûr Agop v. Ohannes zimmî muvâcehesinde bâlâda zikrolunduğu üzere âhara ferağ olunmasına irâde-i aliyye ta‘alluk eden menzil-i mezkûru 35.200 guruş bedel mukābelesinde mersûm Agop zimmîye bâ-re’y-i mütevellî ferağ-ı kat‘î-i mu‘teber ile bi’l-vekâle ferağ ve tefvîz ve teslîm eylediğimde ol dahi ber-vech-i muharrer tefevvüz ve tesellüm ve kabûl eyledikden sonra bedel-i merkūm 35.250 guruşu mesfûr Agop bana def‘ u teslîm ben dahi ber-vech-i muharrer <> alacağım olan meblağ-ı mecmû‘-ı merkūm 41.000 guruşun ol mikdârına takās ve mahsûb eylediğimde bu vechile medyûnum mersûm Abraham zimmetinde 575 guruş bâkī hakkım kalmışdır deyü mukırr-ı mersûm Simyon’u takrîr-i meşrûhunda mesfûr Agop tasdîk eylediği bi’[l]-iltimâs huzûr-ı âlîlerine i‘lâm olundu. Fî 25 Za sene 1221.