Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 346 Hüküm no: 538 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Kalosti ve kardeşi Abraham’ın İmam Sadullah Efendi aleyhine açtıkları alacak davasında anlaşıp zimmetini ibra ettikleri Hayyât esnâfından Artin ve Abraham veledey Kalosti nâm karındaşlar zimmîler Galata’da mahfil-i kazâda İmâm Sadullah Efendi [b.] İbrahim muvâcehesinde biz bundan mukaddemce mahrûse-i Galata’da Karaköy Hamamı karşısında mezbûr Sadullah Efendi’nin bi’l-icâreteyn mutasarrıf olduğu hayyât dükkânında beher şehr beşer guruş icâre ile kable’l-harîk müşâhereten müstecir iken mezbûr Sadullah Efendi gedik-bahâ nâmıyla bizim bir def‘a doksan guruş ve bir def‘a dahi yüz on guruş ki cem‘an iki yüz guruşumuzu bi-gayr-ı vechin ahz etmişidi el-hâletü hâzihî dükkân-ı merkūm bu esnâda vukū‘ bulan harîkde muhterik olup arsa-yı sırfa kaldıkda bizden ber-vech-i meşrûh hâlî gedik-bahâ nâmıyla makbûzu olan meblağ-ı mecmû‘ı merkūm iki yüz guruşu istirdâd murâdımızdır deyü da‘vâ sadedinde iken beynimizde tevfîk ve ıslâh olunup mezbûr Sadullah ber-vech-i muharrer bizden hâlî gedik-bahâ nâmıyla kabz eylediği iki yüz guruşu tamamen bize def‘ biz dahi ahz u kabz edip dükkân-ı mezkûrda ve gediğinden bizim kat‘iyyen alâka ve medhallerimiz kalmamağla husûs-ı mezkûra ve târih-i i‘lâma gelince bi’l-cümle beynimizde cereyân eden ahz u i‘tâ ve mu‘âmelât-ı şettâ ve hukūk-ı sâire-i şer‘iyyeye müte‘allika âmme-i de‘âvî ve mütâlebât ve kâffe-i eymân ve muhâsamâtdan mezbûr Sadullah Efendi ile oğlu işbu hâzır bi’l-meclis Ya‘kub Efendi’nin zimmetlerini kabûllerini hâvî ibrâ ve iskāt edip bu vechile kat‘-ı münâza‘a eyledik deyü ikrâr ve tasdîkleri tescîl ve bi’l-iltimâs huzûr-ı âlîlerine i‘lâm olundu. Fî 17 Za sene 1221.