Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 349 Hüküm no: 543 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe b. Ahmed’in tasarrufunda olan vakıf menzili yıkmasına izin verilmediği Galata’ya muzâfe kasaba-i Kasımpaşa’da el-Hâc Ferhad Mahallesi imâmı Hüseyin Efendi b. Ahmed ve müezzini Molla Mehmed b. el-Hâc Abdullah nâm kimesneler Galata Bâb Mahkemesi’nde meclis-i şer‘de Osman Beşe b. Ahmed nâm kimesne muvâcehesinde mezbûr Osman Beşe galle ve tevliyeti mârru’z--zikr el-Hâc Ferhad Câmi‘-i şerîfinde imâm ve müezzin olanlara meşrût mahalle-i mezbûrede kâin mu‘accele-i ma‘lûme-i müstevfî ve müeccele-i kadîme ile tasarrufunda olan bir bâb vakıf menzilin arsasını bahçe etmek dâ‘iyesiyle hilâf-ı şart-ı vâkıf ebniye-i mevcûdesini hedm ve enkāzını âhara bey‘ murâd etmekle suâl olunup hilâf-ı şart-ı vâkıf ebniye-i mevcûdeye müdâhale etmemek üzere mezbûr Osman Beşe’ye tenbîh olunmak murâdımızdır deyü bi’t-tevliye ba‘de’d-da‘vâ ve’l-istintak mezbûr Osman Beşe dahi cevâbında menzil-i merkūmu icâreteyn ile tasarrufunda olup ber-vech-i muharrer hedm dâ‘iyesinde olduğunu ikrâr etmeğin mûcebince hilâf-ı şer‘ ve mugāyir-i şart-ı vâkıf menzil-i merkūmun ebniye-i mevcûdesine müdâhale etmemek üzere merkūm Osman Beşe’ye tenbîh olunduğu bi[‘l]-iltimâs huzûr-ı âlîlerine i‘lâm olundu. Fî 29 Za sene 1221.