Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 351 Hüküm no: 548 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sıvacı Ali’nin haksız yere birer biniş ve şalvarını aldığı iddiasıyla Çiftçi Haçador aleyhine açtığı tazminât davasında iddiasını ispat edemediği Sıvacı Ali b. Hasan nâm kimesne Galata Bâb Mahkemesi’nde meclis-i şer‘de rençber tâifesinden Haçador v. Mikayil nâm zimmî muvâcehesinde mersûm Haçador zimmî târih-i i‘lâmdan dört sene mukaddem mahrûse-i Galata muzâfâtından Büyükdere karyesinde Hıristo nâm zimmînin müceddeden binâ olunan menzil[in]de bir amele iken menzil-i mezkûr derûnuna vaz‘ eylediğim mecmû‘u otuz beş guruş kıymetli bir kırmızı çuka biniş ve bir mâî çuka şalvarımı bi-gayr-ı hakkın ahz u istihlâk etmekle ba‘de’s-sübût kıymet-i şer‘iyyelerini mersûm Haçador zimmîden tazmîn taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsına ikāmet-i beyyine edemeyip bi’t-taleb mersûm Haçador zimmî ba‘de’t-tahlîfü’ş-şer‘î mûcebince müdde‘î-i mezbûr Ali Beşe da‘vâ-yı mezkûresiyle mersûm Haçador zimmîye bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. Fî 3 Z sene 1221.