Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 352 Hüküm no: 549 Orijinal metin no: [54b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hatun’un İbrail’den İstanbul’a götürmesi için teslim ettiği mallarını kendisine vermediği iddiasıyla İsmail Reis aleyhine açtığı tazminat davasında iddiasını ispat edemediği Mahmiye-i İstanbul’da Sofular Mahallesi’nde sâkine mu‘arrefetü’z-zât Şerife Fâtıma bt. es-Seyyid Abdullah nâm hatun Galata Bâb Mahkemesi’nde meclis-i şer‘de sefîne reislerinden İsmail Reis b. Halil nâm kimesne muvâcehesinde ben târih-i i‘lâmdan üç ay mukaddem Bahr-ı siyah’da vâki‘ İbrail kasabasından sefînesiyle Âsitâne-i aliyye’ye irsâl ve bana teslîm için mezbûr İsmail Reis yedine teslîm eylediğim mecmû‘u üç yüz guruş kıymetli yüz kırk vakıyye revgan-ı sâde ve yirmi sekiz vakıyye şem‘-i revgan ve seksen vakıyye sucuk ve otuz vakıyye yoğurdumu bana teslîm etmeyip âhara bey‘le istihlâk etmekle ba‘de’s-sübût kıymet-i şer‘iyyelerini reis-i mezbûrdan tazmîn taleb ederim deyü da‘vâ ettikde ol dahi cevâbında ber-vech-i muharrer ikrâr lâkin eşyâ-i mezkûreyi müdde‘iye-i mezbûreye tamamen def‘ u teslîm etmişidim deyü ba‘de’d-def‘ ve’l-inkâr dâfi‘-i mezbûr İsmail Reis ber-vech-i muharrer def‘-i mezkûrunu lede’t-tezkiye makbûlü’ş-şehâde idükleri ihbâr olunan İbrahim b. Ahmed ve İsmail b. Ali nâm kimesneler şehâdetleriyle müdde‘iye-i mezbûre Şerife Fâtıma hatun muvâcehesinde vech-i şer‘î üzere isbât etmeğin mûcebince müdde‘iye-i mezbûre Fâtıma hatun da‘vâ-yı mezkûresiyle mezbûr İsmail Reis’e bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 3 Zilhicce sene 1221.