Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 352 Hüküm no: 550 Orijinal metin no: [54b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin İsmail kasabasından İstanbul’e götürmesi için teslim etdiği mallarını kendisine vermediği iddiasıyla Ali Reis aleyhine açtığı tazminât davasında iddiasını ispat edemediği İbrahim Beşe b. Mustafa Galata’da mahfil-i kazâda sefîne reislerinden Ali Reis b. Mehmed muvâcehesinde ben bundan akdem Âsitâne-i aliyye’ye nakl için İsmail kasabasından mezbûrun sefînesine idhâl eylediğim mecmû‘u yüz elli beş guruş kıymetli yetmiş dokuz vakıyye sâde yağı ve beş vakıyye göden sucuğu ve dört Hind tavuğu ve bir ördek ve bir sagīr abâ ve bir Şam alacası anterimi bana vermeyip yedinde kalmağla mevcûd ise a‘yânını müstehlek ise ba‘de’s-sübût kıymet-i mezkûresini mezbûr Ali Reis’den tazmîn taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsına ikāmet-i beyyine edemeyip bi’t-taleb mezbûr Ali Reis ber-nehc-i şer‘î tahlîf olunmağın mûcebince müdde‘î-i mezbûr İbrahim Beşe da‘vâ-yı mezkûresiyle mezbûr Ali Reis’e bilâ-beyyine mu‘ârazadan men‘ olunduğu bi’l-iltimâs [huzûr-ı âlîlerine i‘lâm olundu.] Fî 5 Z sene 1221.