Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 353 Hüküm no: 551 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Molla Halil’in Kalas’a götürmek üzere Seyyid Mahmud Reis’in sefînesine yüklediği incirlerinin seferin iptaliyle kendisine iâdesine karar verildiği Tüccârdan Molla Halil b. Ahmed nâm kimesne Galata Bâb Mahkemesi’nde meclis-i şer‘-i münîrde es-Seyyid Mahmud Reis b. es-Seyyid Mehmed nâm kimesne muvâcehesinde Âsitâne’den Kalas İskelesi’ne nakletmek için navl tâ‘bir olunur ücret ile mezbûr es-Seyyid Mahmud Reis’in râkib olduğu sefînesine malımdan bundan akdem tahmîl eylediğim on iki aded fıçı derûnunda mevzû‘ taban incirlerimi nakl ve îsâlden fâriğ olup sefîne-i merkūmeden ihrâc murâd eylediğimde mezbûr es-Seyyid Mahmud Reis bi-gayr-ı vech-i şer‘î mümâna‘at ve fuzûlî zabt ve imsâk etmekle suâl olunup teslîmine tenbîh olunmak murâdımdır deyü ba‘de’d-da‘vâ ve’s-suâl ve’l-ikrâr alâ-mûcibi ikrârihi zikrolunan incir fıçılarını bi-aynihî müdde‘î-i mezbûra teslîme reis-i merkūma tenbîh olunduğu bi[‘l]-iltimâs huzûr-ı âlîlerine i‘lâm olundu. Fî 4 Z sene 1221.