Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 354 Hüküm no: 555 Orijinal metin no: [55a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hallaç Yuvan v. Dimitri’nin emanetten alacağı olduğu iddiasıyla Berber Yani aleyhine açtığı davada iddiasını ispat edemediği Hallâc tâifesinden Yuvan v. Dimitri nâm zimmî Galata Bâb Mahkemesi’nde meclis-i şer‘de berber esnâfından Yani v. Yuvan nâm zimmî muvâcehesinde ben bundan akdem yedimden ve mâlımdan mersûm Yani zimmîye bi-tarîkı’l-emâne def‘ u teslîm eylediğim kırk iki guruş gāib ani’l-meclis Osman Ağa’ya ver deyü emr etmişidim lâkin mersûm Yani zimmî meblağ-ı mezkûru emrim üzere gāib-i mezbûra vermeyip yedinde kalmağla hâlâ taleb ederim deyü da‘vâ eyledikde ol dahi cevâbında ber-vech-i muharrer meblağ-ı mezkûr gāib-i mezbûr Osman Ağa’ya emrine binâen tamamen vermişidim deyücek mersûm Yani zimmî husûs-ı mezkûrda kavliyle tasdîk olunur ümenâdan olmağla mersûm Yani zimmî ba‘de’t-tahlîfü’ş-şer‘î mûcebince müdde‘î-i mersûm Yuvan zimmî da‘vâ-yı mezkûresiyle mersûm Yani zimmîye bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 19 Zilhicce sene 1221.