Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 356 Hüküm no: 560 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çamaşırcı Seyyid Mustafa Çelebi’nin kiracı olduğu dükkânı tahliye edip mutasarrıflarına teslimine karar verildiği Mahrûse-i Galata’da Zincirli Han karşısında vâki‘ ma‘lûmü’l-hudûd bir kıt‘a câmeşûycu dükkânının bi’l-icâreteyn ale’l-iştirâki’s-seviyy mutasarrıfları Ahmed Halim Efendi ve Osman Nuri Çelebi b. Mustafa ve Mehmed Said Ağa b. Süleyman nâm kimesneler Galata’da mahfil-i kazâda Câmeşûycu es-Seyyid Mustafa Çelebi sâlifü’z-zikr tasarrufumuzda olan câmeşûycu dükkânında beher şehr üç guruş kirâ ile aded-i şühûr beyân olunmaksızın müşâhereten müstecirlerimiz olup lâkin dükkân-ı merkūmun bize lüzûmu olduğuna binâen gāyet-i şehr-i i‘lâma izâfetle fesh-i akd-i îcâr etmemizle suâl olunup zikrolunan dükkânı tahliye ve târih-i i‘lâm şehri gāyetine gelince on ay yirmi günde icâre-i mezkûreden mezbûrun zimmetinde müctemi‘ elli guruş hîn-i îcârda gedik-bahâ nâmıyla mezbûrun yedinden ahz eylediğimiz elli guruşa takās ve mahsûb olunmağın ber-vech-i meşrûh gāyet-i şehr-i mezbûrda dükkân-ı mezkûru tahliye ve hâliyeten bize teslîme mezbûr es-Seyyid Mustafa Çelebi’ye tenbîh olunmak matlûbumuzdur deyü da‘vâ eylediklerinde ol dahi cevâbında ber-vech-i muharrer dükkân-ı mezkûrda müşâhereten müstecir olduğunu ikrâr ve câmeşûycu gediği aklâmda mukayyed bâ-emr-i âlî mu‘teber gediklerden olmadığını i‘tirâf etmeğin mûcebince gāyet-i şehr-i mezkûrda dükkân-ı merkūmu tahliye ve mutasarrıfları mezbûrûna hâliyeten teslîme mezbûr es-Seyyid Mustafa Çelebi’ye şer‘an tenbîh olunduğu tescîl bi[‘l]-iltimâs huzûr-ı âlîlerine i‘lâm olundu. Fî 4 Zilhicce sene 1221.