Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 357 Hüküm no: 561 Orijinal metin no: [55b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çöpçü Kiryako ile Eleni bt. İstavri’nin birbirleri aleyhlerine açtıkları alacak ve tazir davasından vazgeçtikleri Galata hâricinde Hüseyin Ağa Mahallesi’nde mütemekkin Çöpçü Kiryako v. İstavri nâm zimmî Galata Bâb Mahkemesi’nde meclis-i şer‘de mahalle-i mezbûrede mütemekkine mu‘arrefetü’ş-şahs Eleni bt. İstavri nâm Nasrâniye muvâcehesinde mersûme Eleni Nasrâniye zimmetinde cihet-i karzdan yirmi guruş ve bi-şartü’r-rücû‘ emriyle umûr-ı lâzıme-i ma‘lûmesine mâlımdan sarf eylediğim otuz beş guruş ki cem‘an elli beş guruşu Nasrâniye-i mersûmeden bi’l-mürâca‘a taleb ederim deyü da‘vâ ettikde mersûme Eleni Nasrâniye dahi müdde‘î-i mersûm Kiryoka zimmî bi-gayr-ı vechin beni zâbite gamz edip zâbit-i merkūm dahi beni değnek ile koluma darbettirmekle darb-ı mezkûrun tesîrinden nâşî sağ elimin üstü kara bere olmağla mûcib-i şer‘îsini mersûm Kiryako zimmîden taleb ederim deyü da‘vâ eyledikde ve herbiri âharın müdde‘âsını inkâr-birle herbiri tasaddî eyledikleri da‘vâlarından meccânen fâriğler olup husûs-ı mezkûra ve meblağ-ı merkūma müte‘allika da‘vâdan herbiri âharın zimmetini kabûlü hâvî ibrâ ve iskāt eyleyip kat‘-ı münâza‘a eyledikleri tescîl huzûr-ı âlîlerine i‘lâm olundu. Fî 10 Zilhicce sene 1221.