Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 357 Hüküm no: 562 Orijinal metin no: [55b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Santa Marka Mahallesi’ndeki Ermeni kiliseleri cemaatinin nizamlarına uygun şekilde vergilerini Çercis Kilisesi cemaatiyle birlikte ödemeleri gerektiği Mahrûse-i Galata hâricinde Santa Marka Mahallesi ahâlîsinden ashâb-ı arzuhâl Agop v. Sahak ve Koğas v. Hazar ve Mardros v. Bedros ve Avanis v. Hazar ve Nikos v. Artin ve sâir mazbûtü’l-esâmî zimmîler mahrûse-i mezbûre mahkemesinde meclis-i şer‘-i kavîmde mahrûse-i mezbûrede Sultan Bayezid Mahallesi’nde kâin Çercis Kenîsesi cemâ‘atbaşılarından Mardros v. Ohannes ve Haçador v. Avanis ve Dezman v. Makar nâm zimmîler muvâcehesinde herbiri takrîr-i kelâm ve tâ‘bir ani’l-merâm edip Tersâne-i âmire ocaklığı’çün Âsitâne ve tevâbi‘i Ermeniyânı üzerlerine beher sene edâsı lâzım gelen yüz nefer bedel-i kürekden mahrûse-i mezbûre ve muzâfâtının on dört nefer ve bir sülüs hissesinden Hisar ve Kuruçeşme ve Kulaksız’ın yarımışar ve Ortaköy’ün bir ve sülüs ve Beşiktaş’ın bir ve Beyoğlu’nun bir buçuk ve Bereketzâde’nin üç buçuk ve Sultan Bayezid’in üç ve Santa Marka’nın iki buçuk bedel-i küreği ve mahrûse-i mezbûre ve tevâbi‘i Ermeniyânının yirmi üç hâne-i avârızı ve on dört bin iki yüz otuz akçe bedel-i lağımı olup tekâlif-i merkūme beher sene mahall-i merkūme kenîse cemâ‘atbaşılar ma‘rifetiyle cem‘ ve tahsîl ve mahalline edâ olunageldiği yedimizde olup tevârîh-i muhtelife ile müverrah selâtîn-i izâm zamânlarında müte‘addid evâmir-i aliyye mantûklarından ve hâmiş-i arzuhâlde mastûr der-kenârlardan müstebân olmağla yirmi üç hâne-i avârızın ancak on dört hâne ve bir sülüsünü bedel-i kürek tevzî‘i misillü mahallât-ı merkūme ve mâ‘adâ sekiz hâne ve sülüsânını Mirgünoğlu ve Sarıyer ve Büyükdere ve Yeniköy Ermenileri beyninde ale’s-seviyye edâ ve teslîm etmek üzere mahrûse-i mezbûre ve tevâbi‘i Ermeniyânının Çercis, Ayagop Üçhozarlos? ve Meryem Nişankos kenîseleri cemâ‘atbaşıları ittifâkıyla ta‘ahhüdümüzü müş‘ir kıbel-i şerî‘at-i garrâdan i‘tâ olunan hüccet-i şeriye mefhûmundan nümâyân olup ber-vech-i muharrer bedel-i kürek ve avârızdan iki buçuk hissemizi ve bedel-i lağımdan bedel-i kürek tevzî‘ine kıyâsen iki bin dört yüz seksen iki akçe hissemizi mahalle-i mezbûrede Üçhozar Kenîsesi cemâ‘atbaşıları işbu hâzirûn bi’l-meclis Avadis v. Serkiz ve Karabet v. Mihrat ve Kigork v. Mıgırdıç ma‘rifetleriyle cem‘ [56a] ve tahsîl ve Tersâne-i âmire’den edâ tezkireleri mantûklarınca Çercis Kenîsesi cemâ‘atbaşıları ile bi’l-ma‘iyye edâ edegelmiş iken mesfûrûn bu esnâda mugāyir-i evâmir-i aliyye ve hilâf-ı senedât-ı mer‘iyye hareket-birle Santa Marka Çercis’e yamakdır diyerek tekâlif-i merkūmeyi cem‘ ve tahsîl ve ziyâde mesârif ihdâsıyla bizi ızrâr etmeleriyle suâl olunup hilâf-ı evâmir-i aliyye hareketleri men‘ olunmak matlûbumuzdur deyü mazmûnları takrîrlerine mutâbık evâmir-i aliyye ve senedât-ı mer‘iyye ibrâzıyla teşekkî eylediklerinde onlar dahi cevâblarında mazmûn-ı evâmir-i aliyye ve hüccet-i şer‘iyyeyi ikrâr u i‘tirâf ve fîmâ-ba‘d tekâlif-i merkūmeden hisselerine isâbet eden mikdârı Santa Marka Mahallesi kenîseleri cemâ‘atbaşıları cem‘ ve tahsîl ve Çercis cemâ‘atbaşılarıyla olageldiği üzere ma‘an teslîmlerine mümâna‘at ve ta‘arruz olunmayıp evâmir-i aliyye ve senedât-ı mer‘iyye mazmûnları üzere amel ve harekete ta‘ahhüd eylediklerinde emvâl-i mirîye kesr u noksan terettüb etmemek için ta‘ahhüdleri kaydı mahalline şerh ve ilâ-mâşâallah te‘âlâ düstûrü’l-amel tutulmak için verilmek yedlerine tuğra-yı garrâ ile mu‘anven fermân-ı celîlü’ş-şân inâyet ve ihsân buyrulmak bâbında istid‘â-yı inâyet eyledikleri huzûr-ı âsafânelerine i‘lâm olundu. Fî 9 N sene 1221.