Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 853 Hüküm no: 1118 Orijinal metin no: [134a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Mehmed Efendi’nin müezzinler için vakfettiği ev arsasına, Mehmed Çelebi b. Ali’nin yaptığı evin masrafının keşfedilmesi Dârü’l-hilâfeti’l-aliyye Kostantıniyye el-mahmiyye mahallâtından Akseki mahallesi mescid-i şerîfi ve ma‘bed-i latîfinin bi’l-fi‘l müezzini olan fahrü’l-akrân Mehmed Çelebi b. Ali nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîfi râsihü’l-evtâdda takrîr-i kelâm edip merhûm Veli Mehmed Efendi nâm sâhibü’l-hayrın gallesi mescid-i şerîf-i mezkûrda müezzin olanlara meşrûta vakfı olup mahalle-i mezbûrda vâki‘ bir tarafdan ba‘zen mescid-i şerîf-i mezbûrda imâm olanlara meşrûta vakıf menzil ve ba‘zen mescid-i şerîf-i mezbûr ve bir tarafdan ba‘zen yine mescid-i şerîf-i mezbûrda imâm olanlara meşrûta vakıf menzil ve ba‘zen müezzin olanlara meşrût âhar vakıf menzil ve bir tarafdan haffâf Mehmed Çelebi mülkü ve bir tarafdan tarîk-i âm ile mahdûd olan menzil mürûr-ı eyyâm ve kürûr-ı a‘vâm ile harâb olup bir vechile kābil-i süknâ olmamağın müceddeden binâ olunmak lâzım geldikde cânib-i vakıfdan müsâ‘ade olmamağla menzil-i mezbûrun bi’l-fi‘l hasbî mütevellîsi olan Ahmed Çelebi b. Sefer nâm kimesne cânib-i şer‘-i enverden üzerine varılıp muvâcehesinde arsasının ecr-i misli ve üzerinde mevcûd olan nukzu mesâha olunup tahmîn-i sahîh ile tahmîn ve takvîm olundukda arsasının ecr-i misli yevmî birer akçe ve üzerinde mevcûd [134b] olan nukzunun kıymeti bin yedi yüz akçe olduğu lede’ş-şer‘i’l-mutahharda sâbit ve mukarrer olup hüccet olundukdan sonra re’y-i hâkim ile mülküm olmak üzre nefsim için malım ile üzerine binâya bana izin vermeğin ben dahi vech-i mübeyyen üzre mülküm olmak üzre malım ile nefsim için üzerine menzil binâ eylemişimdir, hâliyâ taraf-ı şer‘-i şerîfden üzerine varılıp masrûfum tahmîn-i sahîh ile tahmîn olunmak matlûbumdur dedikde savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi hâssa mi‘mârlardan üstâd Mustafa Halîfe b. Ali ve zeyl-i rakīmde isimleri terkīm olunup ebniye ve sukūf ahvâline ıttılâ‘-ı tâm ve kemâl-i vukūfu olan müslimîn ile üzerine varıp mi‘mârân-ı mezbûrân mütevellî-i merkūm Ahmed Çelebi mahzarında mesâha ettiklerinde tûlen ve arzen bi hesâb-ı terbî‘î elli beş zirâ‘ taş duvarın her zirâ‘ı yetmişer akçeden üç bin sekiz yüz elli akçe ve bi hesâb-ı mezbûr iki yüz yirmi yedi buçuk zirâ‘dır ki duvarın her zirâ‘ı kırkar akçeden dokuz bin yüz akçe def‘a bi hesâb-ı mezbûr elli zirâ‘ sakf taş duvarın her zirâ‘ı seksener akçeden dört bin akçe ve bi hesâb-ı mastûr yüz altmış iki zirâ‘ cedîd sakfın her zirâ‘ı ellişer akçeden sekiz bin yüz akçe def‘a bi hesâb-ı mezkûr doksan altı zirâ‘ sakfı meremmetinin her zirâ‘ı onar akçeden dokuz yüz altmış akçe ve bi hesâb-ı mezbûr kırk dört zirâ‘ tahta tavanın her zirâ‘ı kırkar akçeden beş bin yedi yüz altmış akçe ve bi hesâb-ı mesfûr yüz otuz zirâ‘ı tahta döşemenin her zirâ‘ı otuzar akçeden üç bin dokuz yüz akçe ve bi hesâb-ı mezbûr doksan iki zirâ‘ yirmişer akçeden üç bin sekiz yüz kırk akçe ve bi hesâb-ı mastûr altmış zirâ‘ mahzen taş duvarının her zirâ‘ı kırkar akçeden iki bin dört yüz akçe ve biri korluklu münakkaş iki oda ocağı bin beşer yüz akçeden üç bin akçe ve bir Arabî kanadlı kebîr sandık dolap sekiz yüz akçe ve bir Arabî oda kapısı altı yüz akçe ve üç sâde oda kapıları ikişer yüz ellişer akçeden yedi yüz elli akçe ve altı …? altmışar akçeden üç yüz altmış akçe ve üç ağa tahtasından masnû‘ bir lengerli raf altmış akçe ve bir ağaç parmaklı pencere yüz elli akçe ve geçme billur camları ile çıkrıkçı işi dört ağaç toplu pencere dörder yüz akçeden bin altı yüz akçe ve iki münakkaş masandra bin beşer yüzer akçeden üç bin akçe def‘a bir sâde masandra dört yüz akçe ve altı tepe camlı bir baca bin akçe ve bir sagīr köşk üç bin akçe ve bir dönme yemek dolabı dört yüz akçe ve bir matbah ocağı üç bin akçe ve üç sagīr billur cam pencere yüz yirmişer akçeden üç yüz altmış akçe ve bir kebîr sandık ve sâde kanadlı dolap dört yüz akçe def‘a üçer tahta billurdan masnû‘ iki sagīr cam pencere altmışar akçeden yüz yirmi akçe ve dört geçme trabzan yüz ellişer akçeden altı yüz akçe ve üç oluk yüz yirmişer akçeden üç yüz altmış akçe ve yedi yama direkleri altmışar akçeden dört yüz yirmi akçe ve iki kenîf bin akçe ve bahçe ve parmaklığı yüz yirmi cümle vergenin her vergesi on ikişer akçeden bin dört yüz kırk akçe ve bi hesâb-ı mezkûr yüz yirmi sekiz zirâ‘ taş kaldırımın her zirâ‘ı on altışar akçeden bin beş yüz otuz altı akçe ve bir orta kapı yüz yirmi akçe ve karaağaç tahtasından masnû‘ bir sokak kapısı altı yüz akçe cem‘an yetmiş bir bin üç yüz seksen sekiz akçe ile ancak olur, bundan eksik ile binâ olunmak mümkün değildir, meblağ-ı mezbûrdan mukaddemâ tahmîn olunan bin yedi yüz iki akçe nukz bahâsı ihrâc olunucak altmış dokuz bin altı yüz seksen altı akçe kalır deyû mi‘mârân-ı mezbûrân ile müslimîn-i mezkûrînin icmâ‘ ve ittifâk ettiklerini mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi b. Bayram ile meclis-i şer‘-i hatîre gelip alâ vukū‘ihî inhâ ve takrîr emeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü hameleti’l-Kur’ân Sultan Mehmed Hân câmi‘-i şerîfi hatîbi Şeyh Mehmed Efendi, mefharü’l-hutebâ Mesih Paşa câmi‘-i şerîfi hatîbi Mustafa Efendi b. Hasan, Abdullah Çelebi b. Şeyh Mehmed Efendi, Bâli Paşa câmi‘-i şerîfi imâmı Hasan Efendi [b.] Mustafa, Dülgerzâde câmi‘-i şerîfi imâmı Mehmed Efendi [b.] Osman, Sultan Selim câmi‘-i şerîfi müezzini Yeşil? el-Hâc Receb Ağa b. Süleyman, Ahmed Çelebi b. Mehmed el-Müezzin, Mesih Paşa câmi‘-i şerîfi imâmı Ali Efendi b. Müstakīm, Rıdvan Efendi el-Müezzin, Mehmed Çelebi b. Rıdvan, Hâfız Muharrem Çelebi b. Hamza.