Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 855 Hüküm no: 1119 Orijinal metin no: [134b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed’in, babası Ali Reis’e Mısır’a giderken borç verdiğinin tespiti Medîne-i Galata müzâfâtından kasaba-i Tophâne’de Kuloğlu mescid-i şerîfi mahallesinde sâkin iken bundan akdem garîkan vefât eden el-Hâc Ali Reis b. Mustafa’nın verâseti zevce-i metrûkesi Kâtibe bt. Abdullah nâm hâtun ile sulbî oğlu Mehmed’e münhasıra olduğu şer‘an zâhir ve mütehakkik oldukdan sonra merkūm Mehmed meclis-i şer‘-i hatîr-i lâzımü’t-tevkīrde müteveffâ-yı merkūmun terekesine vâzı‘ü’l-yed olan merkūme Kâtibe Hâtun mahzarında üzerine da‘vâ ve takrîr-i kelâm edip bundan akdem müteveffâ-yı mezbûrun hayâtında ticâret için diyâr-ı Mısır’a gider olduğumda yüz kıt‘a riyâlî guruşumu müteveffâ-yı mezbûra emâneten def‘ ve teslîm edip ol dahi benden ahz u kabz ettiğinden sonra mücehhelen vefât etmekle suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i merkūmdan müdde‘âsını mübeyyine beyyine taleb olundukda udûl-i ricâl-i müslimînden olup kasaba-i mezbûrede Mustafa Ağa mahallesinde sâkin Mustafa Beşe b. Mansur ve Tomtom mahallesi sükkânından Veli b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i merkūm Mehmed bundan akdem müteveffâ-yı mezbûrun hayâtında ticâret için diyâr-ı Mısır’a gider oldukda yüz kıt‘a riyâlî guruşunu bizim huzûrumuzda müteveffâ-yı mezbûra hayâtında îdâ‘ ve teslîm, ol dahi ahz u kabz etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i merkūma meblağ-ı mezbûru müteveffâ-yı mezbûrdan hayâtında ahz u kabz ve istîfâ etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene seb‘a ve seb‘în ve elf Şuhûdü’l-hâl: Kaptan Mustafa Ağa b. Musa, Veli b. Mahmud, Mehmed b. Hasan, Mehmed Çelebi b. Mustafa, Gazanfer Bey b. Tevekkül.