Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 360 Hüküm no: 566 Orijinal metin no: [56a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çubukçu İbrahim Beşe’nin kendisine itâatsizliği iddiasıyla karısı Fâtıma bt. Hasan aleyhine açtığı davada davalıya itâat etmesinin tembih olunduğu Galata’ya muzâfe kasaba-i Tophane’de Firuz Ağa Mahallesi’[nde] sâkin Çubukcu İbrahim Beşe b. Mehmed nâm kimesne Galata Bâb Mahkemesi’nde meclis-i şer‘de zevce-i menkûhası zâtı vech-i şer‘î üzere mu‘arrefe Fâtıma bt. Hasan nâm hatun muvâcehesinde mezbûre Fâtıma hatun mehr-i müeccel ve mu‘accel-i ma‘lûm tesmiyesiyle zevce-i medhûlün-bihâm iken bundan akdem bir def‘a tatlîk ve tecdîd-i akd ve duhûl ettiğimden sonra târih-i i‘lâmdan elli sekiz gün mukaddem kendiye hitâb edip ben sana bugün on beş para vermez isem şart olsun deyü şart ve ta‘lîk etmişidim mu‘allakun-aleyh olan fi‘il-i mezkûr vukū‘una binâen zevcem mezbûre benden talâk-ı ric‘î ile boş olup lâkin ben zevcem mezbûreyi iddeti içinde mürâca‘at etmişiken mezbûre Fâtıma bana itâ‘at ve inkıyâddan ibâ vü imtinâ‘ etmekle suâl olunup bana itâate mezbûreye tenbîh olunmak matlûbumdur deyü ba‘de’d-da‘vâ ve’s-suâl ol dahi cevâbında husûs-ı merkūmu ber-vech-i tafsîl ikrâr u i‘tirâf etmeğin mûcebince zevci mezbûr İbrahim Beşe’ye itâ‘at ve inkıyâda zevcesi mezbûreye tenbîh olunduğu bi’l-iltimâs. Fî 3 Muharrem sene [1]222.