Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 361 Hüküm no: 568 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâmile bt. İbrahim ve kardeşi Hediye ile komşuları Seyyid Mehmed Emin ve oğlu Seyyid Mehmed Salih Çelebi’nin birbirleri aleyhine açtıkları tazir ve tazminat davalarından vazgeçtikleri Galata’ya muzâfe kasaba-i Tophane’de Ekmekçibaşı Mahallesi’nde sâkineler sâhibetey arzuhâl mu‘arrefetü’z-zât Kâmile bt. İbrahim ve kız karındaşı [Hediye] bt. el-mezbûr İbrahim nâm hatunlar Galata’da mahfil-i kazâda câr-ı mülâsıkları derûn-ı arzuhâlde isimleri mezkûr es-Seyyid Mehmed Emin b. es-Seyyid Ali ve oğlu es-Seyyid Mehmed Salih Çelebi nâm kimesneler muvâcehelerinde mezbûrân es-Seyyid Mehmed Emin Ağa ve oğlu es-Seyyid Mehmed Salih Çelebi târih-i i‘lâmdan üç gün mukaddem mahalle-i mezbûrede sâkine olduğumuz menzilimiz kapısını önünde bi’l-muvâcehe bize şetm ve Yatağan bıçağıyla üzerimize hücûm ve menzilimiz kapısını depmelemeleriyle mûcib-i şer‘îsini mezbûrân es-Seyyid Mehmed Emin Ağa ve oğlu es-Seyyid Mehmed Salih Çelebi’den taleb ederiz deyü da‘vâ eylediklerinde onlar dahi inkârlarından mâ‘adâ müdde‘iyetân-ı mezbûretân Kâmile ve Hediye hatunlar kırk guruş hediyeli bir Mushaf-ı şerîfimizi bi-gayr-ı hakkın ahz u istihlâk etmeleriyle ba‘de’s-sübût kıymet-i mezkûresini müdde‘iyetân-ı mezbûretândan tazmîn taleb ederiz deyü da‘vâ onlar dahi inkâr-birle beynlerinde ba‘de vukū‘ı’l-münâza‘a ve bâ-vesâtet-i muslihîn herbirleri tasaddî eyledikleri da‘vâlarından meccânen fâriğler olup husûs-ı mezkûrlara müte‘allika da‘vâdan herbirleri âharın zimmetlerini kabûllerini hâvî ibrâ ve iskāt eyleyip kat‘-ı münâza‘a ve ref‘-i husûmet eyledikleri tescîl ve mübâşirleri Ali Çavuş kulları yediyle huzûr-ı âlîlerine i‘lâm olundu. Fî 2 M sene [1]222.