Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 855 Hüküm no: 1120 Orijinal metin no: [134b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed’in ticaret için Mısır’da iken babası el-Hâc Ali Reis’e yolladığı kahve metâının bedelini babasının terekesinden alması gerektiği Medîne-i Galata müzâfâtından kasaba-i Tophâne’de Kuloğlu mescid-i şerîfi mahallesinde sâkin iken bundan akdem garîkan vefât eden el-Hâc Ali Reis b. Mustafa’nın verâseti zevce-i metrûkesi Kâtibe bt. Abdullah nâm hâtun ile sulbî kebîr oğlu Mehmed’e münhasıra olduğu şer‘an zâhir ve mütehakkik oldukdan sonra merkūm Mehmed meclis-i şer‘-i hatîr-i lâzımü’t-tevkīrde müteveffâ-yı merkūmun terekesine vâzı‘atü’l-yed olan merkūme Kâtibe Hâtun mahzarında üzerine da‘vâ ve takrîr-i kelâm edip bundan akdem müteveffâ-yı mezbûrun hayâtında ben diyâr-ı Mısır’a ticâret üzre iken gāib ani’l-meclis Receb nâm kimesne ile bi tarîki’l-emâne seksen riyâlî guruş kıymetli iki kantar kahvemi irsâl edip ol dahi getirip müteveffâ-yı merkūma îsâl ve teslîm, müteveffâ-yı merkūm dahi yedinden ahz u kabz ettiğinden sonra mücehhelen vefât etmekle suâl [olunup] ihkāk-ı hak olunmak matlûbumdur dedikde, gıbbe’s-suâl ve’l-inkâr müdde‘î-i merkūmdan müdde‘âsını mübeyyine beyyine taleb olundukda udûl-i ricâl-i müslimînden olup kasaba-i mezbûrede Perviz Ağa mahallesi sükkânından Kenan b. Abdullah ve Ekmekçibaşı mahallesi sükkânından Mehmed b. Yusuf nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i merkūm Mehmed babası müteveffâ-yı merkūmun hayâtında diyâr-ı Mısır’da ticâretde iken babası müteveffâ-yı merkūma Receb nâm kimesne ile bi tarîki’l-vedî‘a seksen riyâlî guruş kıymetli iki kantar kahve irsâl edip merkūm Receb dahi zikr olunan iki kantar kahveyi müteveffâ-yı mezbûra hayâtında bizim huzûrumuzda getirip def‘ ve teslîm [135a] ol dahi yedinden ahz u kabz eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i merkūma zikr olunan kahveyi müteveffâ-yı mezbûrdan hayâtında ahz u kabz ve istîfâ etmediğine yemîn teklîf olundukda ol dahi alâ vefki’l-mes’ûl half billâhi’l-aliyyi’l-azîm etmeğin mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Es-Sâbikūn.