Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 366 Hüküm no: 581 Orijinal metin no: [57b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Süleyman’ın emanet ettiği küpesinin kıymetini ödemesi talebiyle Fermeneci v. İstemat aleyhine açtığı davada otuz guruşa sulh olduğu Galata’ya muzâfe kasaba-i Kasımpaşa’da Yenikethüdâ Mahallesi’nde sâkine zâtı mu‘arrefe Hanife bt. Süleyman nâm hatun Galata Bâb Mahkemesi’nde meclis-i şer‘de Fermeneci Yanaki v. İstemat nâm zimmî muvâcehesinde ben mersûm Yanaki zimmî yedine îdâ‘ ve teslîm eylediğim altmış guruş kıymetli elmaslı zümrüd bir tek altın küpemi te‘addîsiyle istihlâk etmekle ba‘de’s-sübût kıymet-i şer‘iyyesini mersûmdan tazmîn taleb ederim deyü tasaddî eylediğim da‘vâmdan bâ-tavassut-ı muslihîn mersûm Yanaki zimmî ile otuz guruş bedel-i makbûza ba‘de’s-sulh ve’l-kabûl zikrolunan küpeye ve kıymetine ve bedel-i sulh-ı mezkûr otuz guruşa müte‘allika da‘vâdan herbirimiz âharın zimmetini ibrâ ve iskāt eyleyip ve herbirimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl huzûr-ı âlîlerine i‘lâm olundu. Fî 3 M sene 1222.