Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 367 Hüküm no: 582 Orijinal metin no: [57b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Abdullah’ın mehir, nafaka ve barınma bedelinden boşandığı kocası Ali Çelebi’den elli beş guruş alacağı olduğu Galata hâricinde Müeyyedzâde Mahallesi’nde sâkin ve zâtı ta‘rîf-i şer‘î ile mu‘arrefe [Zeyneb] bt. Abdullah nâm hatun Galata Bâb Mahkemesi’nde meclis-i şer‘de Ali Çelebi b. Mustafa nâm kimesne muvâcehesinde mezbûr Ali Çelebi zevc-i dâhilim olup târih-i i‘lâmdan bir hafta mukaddem beni tatlîk etmekle zimmetinde mütekarrir ve ma‘kūdun-aleyh mehr-i müeccel hakkım olan elli guruş ile nafaka-i iddet-i ma‘lûmem ve meûnet-i süknâm için bi’t-terâzî ta‘yîn olunan beş guruş ki cem‘an elli beş guruş bana vermeyip yedinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi meblağ-ı merkūm elli beş guruşun müdde‘iye-i mezbûre Zeyneb Hatun’a edâsıyla mezbûr Ali Çelebi ilzâm olunduğu bi[‘l]-iltimâs huzûr-ı âlîlerine i‘lâm olundu. Fî 24 Zilhicce sene 1221.