Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 856 Hüküm no: 1121 Orijinal metin no: [135a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mehmed’in küçük kızı Ümmügülsüm’ün bakımını halası Rabia’nın üstlendiği Mahmiye-i İstanbul’da Abdi Subaşı mahallesinde sâkin el-Hâc Mehmed b. el-Hâc Ali nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Ali Paşa-yı Atîk mahallesi sâkinelerinden Râbia bt. Mehmed Ağa tarafından husûs-ı âti’l-beyâna vekîl olup Bayram Beşe b. Abdullah ve Ahmed Bey b. Abdullah nâm kimesneler şehâdetleriyle şer‘an vekâleti sâbite olan Hasan Bey b. Mehmed nâm kimesne mahzarında ikrâr ve takrîr-i kelâm edip zevcem olup bundan akdem vefât eden Âişe bt. Hüseyin Ağa nâm hâtundan tevellüd eden sagīre kızım Ümmügülsüm’ün müvekkile-i mezbûre halası olmağla hakk-ı hidâne müvekkile-i mezbûrenin olup sagīre-i mezbûre benim yanımda olmağla sagīre-i mezbûreyi ba‘de’l-yevm müvekkile-i mezbûreye teslîm edip müvekkile-i mezbûre dahi sagīre-i mezbûreyi müteveffâ-yı mezbûre malından farz ve takdîr olunan yevmî on bir akçe ile infâk ve iksâ edip ziyâde taleb etmeyip ve sagīre-i mezbûreyi haftada bir kerre benim menzilime gelip yatmakdan men‘ etmemek üzre kavl ve ittifâk eyledik dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Ramazâni’l-mübârek li sene seb‘a ve seb‘în ve elf, Şuhûdü’l-hâl: Mehmed Çelebi b. Abdullah, Abdi Çelebi b. Hüseyin, Şükrullah Bey b. Mustafa, Hasan Çelebi b. Ahmed.