Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 368 Hüküm no: 585 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saka Vartan v. Nehabet’in başkasına ait şerbetçi gediğini kendisine satan Şerbetçi Sahak v. Haçador’dan altı yüz altmış guruş alacağı olduğu Galata hâricinde Ketehorya nâm mahalde mütemekkin arzuhâl eden Saka Vartan v. Nehabet nâm zimmî Galata Bâb Mahkemesi’nde meclis-i şer‘de derûn-ı arzuhâlde mersûmü’l-ism Şerbetçi Sahak v. Haçador nâm zimmî muvâcehesinde mersûm Sahak zimmî gāib ani’l-meclis Şerbetçi Avanis v. Ağya nâm zimmînin mahâll-i merkūmda vâki‘ bir bâb şerbethâne derûnunda mevcûde şerbetçi gediği tâ‘bir olunur âlât-ı lâzıme-i ma‘lûmeyi benim yedimde emvâlimdir deyü altı yüz altmış guruş semen-i medfû‘ ve makbûza fuzûlî bana bey‘ edip ba‘dehû gāib-i mersûm âlât-ı mezkûreyi yedimden ahz etmekle medfû‘um olan meblağ-ı mezkûr altı yüz altmış guruşu mersûm Sahak zimmîden istirdâd ederim deyü ba‘de’d-da‘vâ ve’l-inkâr müdde‘î-i mersûm Vartan zimmî ber-vech-i muharrer müdde‘âsını lede’t-tezkiye şehâdetleri makbûle olan Hancı Yano v. Avanis ve Saka Toros v. Avadik nâm zimmîler şehâdetleriyle mersûm Sahak zimmî muvâcehesinde vech-i şer‘î üzere ihbâr etmeğin mûcebince meblağ-ı [mezkûr] altı yüz altmış guruşu müdde‘î-i mersûm Vartan zimmîye red ü teslîme mersûm Sahak zimmîye tenbîh olunduğu mübâşirleri Ali Çavuş kulları yediyle huzûr-ı âlîlerine i‘lâm olundu. Fî 10 Muharrem sene 1222.