Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 368 Hüküm no: 586 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahalinin şikayeti üzerine uygunsuz hareketleri görülen Hadice, Fâtıma, Emine, Mehmed Beşe ve diğer Mehmed Beşe’nin tazir cezasıyla birlikte mahalleden çıkarılmaları gerektiği Galata’da Emekyemez Mahallesi imâmı es-Seyyid Mustafa Efendi ve müezzini Hâfız Mehmed Emin Efendi ve ahâlîsinden İsmail Alemdâr ve Hasan Alemdâr ve Mehmed Ağa ve diğer Mehmed Ağa ve Makaracı Osman Beşe ve es-Seyyid Halil Çelebi ve Kalafatçı Mehmed Ağa ve Mehmed Şâkir Ağa ve Mustafa Beşe ve Mehmed Emin Çavuş ve Galata voyvodası tarafından Subaşı Ali Beşe ve sâirleri Galata Bâb Mahkemesi’nde meclis-i şer‘de mahalle-i merkūmede müsteciren sâkineler Hadice bt. Mustafa ve Fâtıma bt. İbrahim ve Emine bt. Abdullah nâm hatunlar ile Mehmed Beşe b. Mustafa ve diğer Mehmed Beşe b. Mahmud nâm kimesneler muvâcehelerinde târih-i i‘lâm gece sa‘at bir buçukda birbirine ecnebî olduğu hâlde bir menzilde ahz olunmalarıyla kendilerden suâl olunup mûcib-i şer‘îsi icrâ olunmak ve mezbûrât mahalle-i mezbûreden ihrâc olunmaları matlûbumuzdur dediklerinde mezbûrât ve mezbûrân herbiri âhara ecnebî olduklarını ve menzil-i mezkûrda ahz olunduklarını herbiri ikrâr u i‘tirâf etmekle mûcebince mezbûrât ile mezbûrândan herbirine ta‘zîr lâzım gelip ve mezbûrât mahalle-i merkūmeden hurûcları iktizâ eylediği huzûr-ı âlîlerine i‘lâm olundu. Fî 12 M sene 1222.