Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 857 Hüküm no: 1122 Orijinal metin no: [135a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Semuyil v. Mosi’nin, kardeşi Hayder’den alacağını tahsil ettiği Kirüz cemâ‘atinden Semuyil v. Mosi nâm tâcir Yahudi meclis-i şer‘-i hatîrde li ebeveyn karındaşı Hayder nâm Yahudi muvâcehesinde ikrâr ve takrîr-i kelâm edip karındaşım merkūm Hayder ile târih-i kitâba gelinceye değin beynimizde nice bey‘ ve şirâ ve ahz ve i‘tâ ve mu‘âmelât-ı şettâ vâki‘ olmuşidi hâlâ merkūm Hayder ile hesâb gördüğümüz[de] bana zimmetinde bin dört yüz esedî guruş deyni zuhûr etmişidi, meblağ-ı mezbûr bin dört yüz esedî guruşu merkūm Hayder yedinden tamâmen ahz u kabz eyledikden sonra târih-i kitâba gelince beynimizde cârî olan ahz ve i‘tâya ve hâlik olan babamız mezbûr Mosi’nin mîrâsına müte‘allika cemî‘ de‘âvî ve mütâlebâtdan her birimiz âharı ibrâ-i âmm-ı kātı‘ü’n-nizâ‘la ibrâ ve iskāt eyledik min ba‘d birimizin âhar ile gerek babamız hâlik-i mezbûrun muhallefâtına ve gayra müte‘allika da‘vâ ve nizâ‘ımız kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çelebi b. ( ) Kethüdâ-yı muhzırân, Gazanfer Bey b. Tevekkül, Veli b. Mahmud, İbrahim b. Mehmed.