Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 372 Hüküm no: 594 Orijinal metin no: [58b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varilci Todori varilci dükkanı gediği hissesini fuzuli zapt ettiği iddiasıyla Liyozi v. Nikola aleyhine açtığı men‘ davasında davalının zimmetini ibra ettiği Varilci esnâfından Todori v. Stirati zimmî Galata’da mahfil-i kazâda esnâf-ı merkūmeden Liyozi v. Nikola zimmî muvâcehesinde esnâf-ı merkūme kethüdâsı Panayot ve yiğitbaşıları Nikola ve çavuşları İsmail hâzır oldukları hâlde mahrûse-i Galata’da Kalafatyeri nâm mahalde vâki‘ ma‘lûmü’l-hudûd bir kıt‘a varilci dükkânı derûnunda mevcûde beyne’l-hiref gedik tâ‘bir olunur âlât-ı lâzıme-i ma‘lûmenin bâ-defter-i müfredât nısf-ı şâyi‘i yedimde mâlım iken mersûm Nikola âlât-ı merkūmenin nısf-ı şâyi‘i fuzûlî zabt etmekle suâl olunup âlât-ı merkūmenin nısf-ı şâyi‘ini bana teslîme mersûm Nikola zimmîye tenbîh olunmak matlûbumdur deyü da‘vâya tasaddî eylediğimde ol dahi cevâbında ber-vech-i muharrer mâlik olduğun âlât-ı merkūmenin nısf-ı şâyi‘ini bundan akdem bi-safkatin vâhidetin bin iki yüz guruş semen-i medfû‘ ve makbûza bana bey‘ ve teslîm eyledin deyü eylediği def‘ini hâzirûn-ı merkūmun Panayot ve Nikola ve İsmail Çavuş ile sâir ustalarından Yorgi v. Andon ve Koni v. Yani ve Andon v. Yani ve Kiryako v. Yani ve diğer Yorgi v. Hıristo ve Dimitri v. Zakari nâm dokuz nefer şahıs şehâdetleriyle muvâcehesinde vech-i şer‘î üzere isbât edip ben da‘vâ-yı mezkûremde bî-vech mu‘ârazadan men‘ olunduğumdan sonra mersûm Nikola zimmî hâtırıma mürâ‘aten işbu meclis-i şer‘de teberru‘an mâlından bana elli guruş def‘ ve teslîm ben dahi yedinden tesellüm ve kabz edip zikrolunan gediğe ve târih-i i‘lâma gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı sâire-i şer‘iyyeye müte‘allika âmme-i da‘vâdan mersûm Nikola zimmînin zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâmı kabûl edip bu vechile kat‘-ı münâza‘a eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 22 M sene 1222.