Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 376 Hüküm no: 603 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Reis b. Hacı Mehmed ile Fransalı İsak v. Gavril’in birbirlerinden alacak davalarından vazgeçtikleri Sefîne reislerinden Ahmed Reis b. el-Hâc Mehmed nâm kimesne Galata Bâb Mahkemesi’nde meclis-i şer‘de Françelü İsak v. Gavril nâm Yahûdi muvâcehesinde Françe baştercümânı Françesko Frankini tarafından Kapıoğlanı Kirkor hâzır olduğu hâlde ben Yahûdi-i mersûm ile fâide-i hâsılası beynimizde münâsafaten taksîm olunmak üzere bir müddet şerîk olup hâlâ fesh-i akd-i şirket-birle hesâbımızı sahîhan rü’yet eylediğimizde re’s-i mâl ve fâide-i hâsıladan benim hisseme isâbet eden dokuz yüz elli altı guruşdan bâkī yüz otuz altı guruş on para Yahûdi mersûm zimmetinde kalmağla hâlâ taleb ederim deyü tasaddî eylediğim da‘vâmdan meccânen fâriğ olup meblağ-ı bâkī-i merkūma müte‘allika da‘vâdan ben Yahûdi-i mersûmun zimmetini meccânen ibrâ, Yahûdi-i mersûm dahi cihet-i havâleden benden iddi‘â eylediği seksen guruşa müte‘allika da‘vâdan benim zimmetimi kezâlik meccânen ibrâ ve iskāt eyleyip herbirimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 22 Muharremi’l-harâm sene 1222.