Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 376 Hüküm no: 604 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Feyzullah’ın sulh olduğu alacak davasında Çamaşırcı Ahmed Beşe’den sulh bedeli olarak yirmi guruş alacağı olduğu Kalyoncu tâifesinden Feyzullah b. Mehmed nâm kimesne Galata Bâb Mahkemesi’nde meclis-i şer‘de Câmeşûycu Ahmed Beşe b. Osman nâm kimesne muvâcehesinde ben bundan akdem mecmû‘u otuz üç guruş kıymetli bir dizlik ve bir yelek ve bir Ahmediye ve bir don ve iki gömleğimi yıkamak için mezbûr Ahmed Beşe’ye teslîm ol dahi yedimden ba‘de’l-ahz te‘addîsiyle istihlâk etmekle hâlâ eşyâ-i mezkûrelerin kıymeti olan meblağ-ı mecmû‘-ı mezkûr otuz üç guruşu mezbûr Ahmed Beşe’den taleb ederim deyü mezbûr Feyzullah tasaddî eylediği da‘vâsından bâ-tavassut-ı muslihîn yirmi guruşa ba‘de’s-sulh ve’l-kabûl mâ‘adâ on üç guruşa müte‘allika da‘vâdan mezbûr Ahmed Beşe’nin zimmetini ba‘de’l-ibrâ ve’l-kabûl mezbûr Ahmed Beşe ibrâdan müstesnâ olan bedel-i sulh-ı mezkûr yirmi guruşu müdde‘î-i mezbûr Feyzullah zimmetinde sahîhan deyni olduğunu ikrâr u i‘tirâf etmeğin mûcebince bedel-i sulh-ı mezkûr yirmi guruşu müdde‘î-i mezbûr Feyzullah’a edâsıyla mezbûr Ahmed Beşe ilzâm olunduğu huzûr-ı âlîlerine i‘lâm olundu. Fî 15 M sene 1222.