Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 857 Hüküm no: 1123 Orijinal metin no: [135a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın para vakfının eski mütevellisinin vakıf malını yeni mütevelli Mehmed Efendi’ye teslim ettiği Mahmiye-i İstanbul’da Muhsine Hâtun mahallesi sâkinelerinden fahrü’l-muhadderât Hatice Hâtun bt. Abdullah’ın nukūd-i mevkūfesine bi’l-fi‘l mütevellî olup mahalle-i mezbûrda imâm olan Mehmed Efendi b. Sefer nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de kendiden mukaddem vakf-ı mezbûrun mütevellîsi olan fahrü’l-müderrisîni’l-kirâm bâ‘isü hâze’l-kitâb Halil Efendi b. Mehmed mahzarında bi’t-tav‘i’s-sâf ikrâr ve takrîr-i kelâm edip mûmâ-ileyh Halil Efendi mâl-ı vakf-ı mezbûrdan yedinde olan beş yüz esedî guruşu tamâmen bana teslîm edip ben dahi cümlesini yedinden ahz u kabz eyledim min ba‘d vakf-ı mezbûr malından mûmâ-ileyh Halil Efendi yedinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-akrân İbrahim Çelebi b. ( ) Kethüdâ-yı bezzâzistân, Mustafa Çelebi b. Mehmed eş-şehîr bi meşe, Musli Çelebi b. Şaban, Hamza Çelebi b. Mehmed, el-Hâc Ahmed b. Mehmed, Hüseyin Çelebi b. Abdullah, Mehmed Halîfe b. Mustafa, es-Seyyid Hasan b. es-Seyyid Ahmed.