Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 377 Hüküm no: 605 Orijinal metin no: [59b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hâfız Musa’nın tasarrufunda olduğunu iddia ettiği vakıf menzil hissesinin daha önce Münteha bt. Hasan’a devredildiği anlaşıldığından müdahaleden men‘ davasında haksız olduğu Sâhib-i arzuhâl mu‘arrefetü’z-zât Âişe nâm hatun Galata Bâb Mahkemesi’nde meclis-i şer‘de kezâlik zâtı mu‘arrefe Müntehâ bt. Hasan nâm hatun muvâcehesinde Galata’da seccâde-nişîn-i şerî‘at-i garrâ olan fazîletlü efendiler dâ‘îleri nezâretlerinde evkāfdan olup ashâb-ı hayrâtdan merhûm Mehmed Çavuş b. Ahmed [nâm] sâhibü’l-hayrın kasaba-i Kasımpaşa’da Çatma Mescid’e vaz‘ eylediği abdesthânenin âb-keş vakfından olup Galata hâricinde Kamer Hatun Mahallesi’nde vâki‘ ma‘lûmü’l-hudûd ve’l-müştemilât beher şehr otuz akçe icâre-i müeccele ve mu‘accele-i ma‘lûmesi ile bir bâb menzilin nısf hissesine babam Hâfız Musa b. Nurullah mutasarrıf iken hâl-i sıgārımda babam mezbûr fevt olup nısf menzil-i mezkûr âdiyyen bana intikāl etmişiken mezbûre Müntehâ Hatun nısf menzil-i mezkûru bi-gayr-ı vechin fuzûlî zabt u tasarruf etmekle suâl olunup nısf menzil-i mezkûrdan kasr-ı yed ve bana teslime mezbûre Müntehâ Hatun’a tenbîh olunmak matlûbumdur deyü menzil-i mezkûrun mütevelliyesi Rukiye Hatun tarafından vakf-ı mezbûrun Kâtibi Abdullah hâzır olduğu hâlde da‘vâ ettikde mezbûre Müntehâ Hatun cevâbında işbu yedimde olan temessük-ı mütevellî mantûkunca fi’l-vâki‘ nısf menzil-i mezkûr müdde‘iye-i mezbûre Âişe Hatun’un babası mezbûr Hâfız Musa’nın tasarrufunda iken müdde‘iye-i mezbûre Âişe Hatun’a sagīre iken babası mezbûr Hâfız Musa fevt olup nısf menzil-i mezkûr sulbiye sagīre kızı mezbûre Âişe’ye ba‘de’l-intikāl müdde‘iye-i mezbûre Âişe’nin vâlide ve bâ-hüccet-i şer‘iyye vasiyy-i mansûbesi gāibe ani’l-meclis Zeyneb bt. Ahmed nâm hatun nısf menzil-i mezkûru âhara bedel-i misliyle ferağa ve bedeli istirbâh olunup nemâsıyla sagīre-i mezbûre Âişe infâk olunmak üzere bin yüz doksan altı senesi tarihiyle müverraha Galata’da Kısmet-i Askeriyye Mahkemesi sicillinde mastûr ve mukayyed olup işbu meclis-i şer‘de feth ve kırâet olunan bir kıt‘a izin hücceti mantûkunca bedel-i ma‘lûm ve makbûza işbu hâzır bi’l-meclis Mahmud Efendi b. Ramazan nâm kimesneye bi’l-vesâye bâ-re’y-i mütevellî ferağ ve tefvîz ve mezbûr Mahmud Efendi dahi nısf menzil-i mezkûru târih-i mezkûrda vasiyy-i mezbûre Zeyneb Hatun dahi nısf menzil-i mezkûru nısf-ı âharına mutasarrıfe olan işbu hâzıra bi’l-meclis Âişe bt. Hasan nâm hatuna bin iki yüz üç senesinde bedel-i ma‘lûm ve makbûza re’y-i mütevellîyle ferağ ve tefvîz ve mezbûre Âişe Hatun dahi mecmû‘-ı menzil-i mezkûru bin iki yüz yirmi bir senesinde bedel-i ma‘lûm ve makbûza bâ-re’y-i mütevellî kat‘iyyen bana fâriğa olmuş idi deyü eylediği def‘ini ve mazmûn-ı hüccet-i mezkûreyi lede’t-tezkiye adâletleri zâhir olan eşrâf-ı kuzâtdan es-Seyyid Ahmed Efendi b. el-Hâc Yusuf ve el-Hâc Mustafa Efendi b. el-Hâc Mehmed nâm kimesneler şehâdetleriyle müdde‘iye-i mezbûre Âişe Hatun muvâcehesinde vech-i şer‘î üzere isbât etmeğin [60a] mûcebince müdde‘iye-i mezbûre Âişe Hatun nısf menzil-i mezkûru da‘vâ ve mütâlebesiyle mezbûre Müntehâ Hatun’a bî-vech mu‘ârazadan men‘ olunduğu mübâşirleri Mustafa Çavuş kulları yediyle huzûr-ı âlîlerine i‘lâm olundu. Fî 16 M sene 1222.