Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 380 Hüküm no: 613 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ali’nin tasarrufunda olan vakıf arsasının bir kısmını kız kardeşi Rukiye Hatun’a vakıf mütevellîsinin izniyle otuz guruşa devrettiği Sâdır olan fermân-ı âlîlerine imtisâlen Galata Bâb Mahkemesi’nden me’zûnen mürsel Kâtib es-Seyyid İsmail Efendi dâ‘îleri ve hâssa mi‘mârı hulefâsından Mustafa Halîfe ile Galata kādıları fazîletli efendiler dâ‘îleri nezâretlerinde âsûde olan evkāfdan olup ashâb-ı hayrâtdan merhûm Abdulkādir Çavuş Vakfı’ndan Galata’ya muzâfe Kasımpaşa’da Câmi‘-i kebîr Mahallesi’nde vâki‘ sâhibe-i arzuhâl Emine bt. Ali nâm hatunun muhterik mutasarrıfe olduğu menzil arsası üzerine varıp arsa-yı merkūmenin mütevellîsi tarafından câbî-i vakf Mehmed Said Efendi hâzır olduğu hâlde huzûr-ı Müslimînde akd-i meclis-i şer‘-i âlî ettikde mezbûre Emine Hatun meclis-i ma‘kūd-ı mezkûrda arsa-yı mezkûreye muttasıl bir bâb muhterik menzil arsası mutasarrıfesi li-ebeveyn kız karındaşı derûn-ı arzuhâlde mezkûretü’l-ism Rukiye nâm hatun muvâcehesinde kız karındaşım mezbûre Rukiye Hatun mi‘mâr-ı mezbûr müsâ‘adesiyle terbî‘an yüz elli yedi zirâ‘ arsa-yı mezkûremden terbî‘an on yedi zirâ‘ arsamı fuzûlî ahz u mutasarrıfe olduğu arsa-yı mezkûresine zamm ü ilhâk etmekle keff-i yedine tenbîh olunmak matlûbumdur deyü da‘vâ eylediğimde bu vechile beynimizde ba‘de vukū‘ı’l-münâza‘a ben zikrolunan on yedi zirâ‘ arsa-yı mezkûremi kız karındaşım mezbûre Rukiye Hatun’a otuz guruş bedel-i makbûza bâ-re’y-i mütevellî ferağ ve tefvîz eylediğimde ol dahi tefevvüz ve kabûl edip ben zikrolunan on yedi zirâ‘ arsaya ol dahi bedel-i merkūme müte‘allika da‘vâdan herbirimiz âharın zimmetini ibrâ ve herbirimiz âharın ibrâsını kabûl eyledik deyü ikrâr ve tasdîklerini mezbûr dâ‘îleri mahallinde ba‘de’t-tahrîr ve’l-inhâ huzûr-ı âlîlerine i‘lâm olundu. bâkī emr hazret-i men lehü’l-emrindir. Fî 27 Muharrem sene 1222.