Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 381 Hüküm no: 614 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Hüseyin’in karzdan Mustafa Beşe b. Mehmed’den yetmiş dört guruş alacağı olduğu Derûn-ı arzuhâlde ismi mezkûr ve zâtı mu‘arrefe Hanife Hatun bt. Hüseyin bi’t-terâzî Galata’da mahfil-i kazâda sâhib-i arzuhâl Mustafa Beşe b. Mehmed muvâcehesinde mezbûr Mustafa Beşe bundan akdem yedimden ve mâlımdan iktirâz ve kabz eylediği bâ-temessük iki yüz guruş deyni mukābelesinde mâlından bir sim çapraz ve bir altın kuşak ve bir anteri ve bir kıt‘a gedik temessüğü vaz‘ ve yedime teslîm eyledikden sonra deyn-i merkūmun yüz yirmi guruşunu bana edâ ve teslîm-birle ancak zikrolunan sim çaprazı rehniyetden fek ve kendiye teslîm eylediğimde ol dahi ahz u kabz ve mâ‘adâ eşyâ-i muharrere-i mezkûreyi bâkī seksen guruş deyni için rehniyetde ibkā etmişidi el-hâletü hâzihî deyn-i bâkī-i mezkûr seksen guruşu bana edâ-birle fekk-i rehn olunmak matlûbumdur deyü da‘vâ eyledikde ol dahi cevâbında ber-vech-i muharrer ikrâr u i‘tirâf edip lâkin müdde‘iye-i mezbûreye meblağ-ı merkūm için bilâ-devr-i şer‘î ribâ nâmıyla ceste ceste medfû‘um olan cem‘an seksen beş guruşun seksen guruşu bâkī deynim olan seksen guruşa takās ve mahsûb olunup bâkī beş guruşu istirdâd ile fekk-i rehn murâdımdır dedikde mezbûre Hanife Hatun cevâbında bilâ-devr-i şer‘i ribâ nâmıyla ancak altı guruş kabzını ikrâr ziyâdeyi inkâr etmekle mezbûr Mustafa Beşe ziyâde ribâ da‘vâsına ikāmet-i beyyine edemeyip bi’t-taleb mezbûre Hanife Hatun ba‘de’t-tahlîfü’ş-şer‘î mûcebince müdde‘î-i mezbûr Mustafa Beşe ziyâde ribâ da‘vâsıyla ba‘de’l-men‘ mezbûr Mustafa Beşe’nin ikrârıyla lâzım gelen seksen guruşdan mezbûre Hanife’nin ribâ nâmıyla makbûzu olan altı guruşu fürûnihâde kılınıp bâkī yetmiş dört guruşu müdde‘iye-i mezbûre Hanife Hatun’a edâ-birle fekk-i rehine mezbûr Mustafa Beşe’ye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 28 M sene 1222.