Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 858 Hüküm no: 1124 Orijinal metin no: [135a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani Hatun’un evini kocası Ali Çelebi b. Abdülmümin’e sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi umdetü’l-a‘yân zübdetü’l-akrân Ali Çelebi b. Abdülmümin nâm kimesnenin Dârü’l-hilâfeti’l-aliyye Kostantıniyye el-mahmiyye mahallâtından Muhtesib İskender mahallesinde vâki‘ menziline varıp zeyl-i rakīmde isimleri terkīm olunan udûl-i müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde mûmâ-ileyh Ali Çelebi’nin zevce-i menkûhası Ümmühâni Hâtun bt. Kazancızâde Mehmed Efendi zâtını ma‘rifet-i şer‘iyye ile ârifân mahalle-i mezbûre mescid-i şerîfi imâmı es-Seyyid Mehmed Efendi b. es-Seyyid Mustafa ve kayyımı İbrahim Halîfe b. Süleyman ta‘rîfleriyle mu‘arrefe oldukdan sonra meclis-i ma‘kūd-ı mezbûrda zevci müşârün-ileyh Ali Çelebi mahzarında bi’t-tav‘i’s-sâf ikrâr ve i‘tirâf edip mahalle-i mezbûrda vâki‘ bir tarafdan ba‘zen mu‘allimhâne ve ba‘zen müezzin Hacı Mehmed mülkü ve bir tarafdan ba‘zen na‘lcı İbrahim Çelebi Hâtun’u mülkü ve bir tarafdan ba‘zen Râbia Hâtun mülkü ve bir tarafdan müderris Abdüllatîf Efendi veresesi mülkü ve bir tarafdan tarîk-i âm ile mahdûd ve hâriciyyede fevkānî üç oda ve bir ahır ve bir su kuyusu ve birisi bakkal dükkânı ve birisi terzi dükkânları ve bir samanhâneyi ve dâhiliyyede fevkānî üç oda ve bir kiler ve tahtânî bir matbah ve mahtab ve hadîka ve kenîfi müştemil mülk menzilimi cemî‘ tevâbi‘ ve levâhıkı ve âmme-i hukūk ve merâfıkı ile târih-i kitâbdan dört sene mukaddem zevcim mezbûr Ali Çelebi’ye yüz elli altı bin akçeye bey‘ ve teslîm, ol dahi iştirâ ve kabûl ve tesellüm eyledikden sonra semeni olan meblağ-ı mezkûr yüz elli altı bin akçeyi târih-i mezkûrda tamâmen yedinden ahz u kabz eylemiş idim, menzil-i mezkûr târih-i mesfûrdan beri zevcim merkūm Ali Çelebi’nin mülk-i müşterâsı olup benim alâkam ve medhalim kalmamışdır dedikde, gıbbe’t-tasdîki’ş-şer‘î husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü’l-vâ‘izîn zübdetü’n-nâsihîn es-Seyyid Hüseyin Efendi b. Ali eş-Şehîr bi Gök Şeyh, umdetü’l-mevâli’l-izâm es-Seyyid Abdüllatîf Efendi b. es-Seyyid Sâlih Efendi Erzurum kadısı sâbıkan, fahrü’l-kuzât İbrahim Efendi [b.] Hüsameddin, el-Hâc Mehmed Efendi b. el-Hâc Mustafa, müezzin Süleyman Çelebi b. Mustafa, müezzin Ömer Çelebi b. Mustafa, Bekir Ağa b. Hüsameddin, Hüseyin Beşe b. Hasan, kuşçu Ali Çelebi b. Halil, Seyfullah b. Abdullah, es-Seyyid Abdi Çelebi b. es-Seyyid Abdürrahim.