Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 859 Hüküm no: 1125 Orijinal metin no: [135a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani Hatun’un kocası Ali Çelebi’den mehrini aldığı ve evdeki tüm eşyaların kocasına ait olduğu Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi umdetü’l-akrân Ali Çelebi b. Abdülmümin nâm kimesnenin menziline varıp zeyl-i rakīmde isimleri terkīm olunan udûl-i müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde mûmâ-ileyh Ali Çelebi’nin zevce-i menkûhası Ümmühâni Hâtun bt. Kazancızâde Mehmed Efendi zâtı ma‘rifet-i şer‘iyye ile ârifân mahalle-i mezbûrda mescid-i şerîf ve ma‘bed-i latîfinin imâmı es-Seyyid Mehmed Efendi b. es-Seyyid Mustafa ve kayyımı İbrahim Halîfe b. İsmail ta‘rîfleriyle mu‘arrefe oldukdan sonra meclis-i ma‘kūd-ı mezbûrda zevc-i müşârün-ileyh Ali Çelebi mahzarında bi’t-tav‘i’s-sâf ikrâr ve i‘tirâf edip zevcim mûmâ-ileyh Ali Çelebi zimmetinde mütekarrir ve ma‘kūdun-aleyh olan yirmi bin akçe mehr-i müeccel-i müsemmâmı târih-i kitâbdan dört sene mukaddem yedinden tamâmen alıp kabz [ve] mesârifime sarf ve istihlâk eyledim ve zevcim mûmâ-ileyh Ali Çelebi’ye bundan akdem semen-i ma‘lûm-ı makbûza bey‘ ve teslîm ettiğim mahalle-i mezbûrda vâki‘ hâlâ ma‘an sâkin [135b] olduğumuz menzil içinde olan beynimizde ma‘lûm bir mikdâr eşyâ ve esâs-ı menzil, evânî-i nühâsiyye ve libâsımdan gayrı her ne var ise ve hâlâ hizmetimizde olan cevârînin cümlesi zevcim mûmâ-ileyh Ali Çelebi’nin mülkü olup kat‘an birinde benim alâka ve medhalim yokdur dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahallinde terkīm ba‘dehû ma‘an irsâl olunan Hasan Çelebi ile meclis-i şer‘a gelip alâ vukū‘ihî inhâ ve tahrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Es-Sâbikūn.