Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 861 Hüküm no: 1127 Orijinal metin no: [135b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üsküfçü Hüsameddin’in vakıf arsasına Abdülbâki Efendi’nin mütevelli tayin olduğu Merhûm Üsküfçü Hüsameddin nâm sâhibü’l-hayrın süknâsı sulehâya meşrûta vakfı olup Dârü’l-hilâfeti’l-aliyye Kostantıniyye el-mahmiyye mahallâtından Emin Sinan mahallesinde vâki‘ bir tarafdan Mehmed Paşa vakfı ve bir tarafdan Emin Sinan vakfı ve bir tarafdan Lefkeli sarayı ve bir tarafdan tarîk-i âm ile mahdûd binâsı muhterik menzil arsasına bir hasbî mütevellî nasb olunmak ehem ve elzem ve işbu bâ‘isü’l-kitâb fahrü’l-eşbâh Abdülbâkī Efendi b. Abdullah nâm kimesne müstakīm ve dindâr olup umûr-ı tevliyyet uhdesinden gelmeğe kemâ yenbağī kādir olmağın merkūm Abdülbâkī Efendi arsa-i mevkūfe-i mezbûreye kıbel-i şer‘-i mübînden mütevellî nasb ve ta‘yîn olundukda, ol dahi tevliyyet-i merkūmeyi kabûl ve merâsimini edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Receb b. Hamdullah, İbrahim b. Mehmed, Ömer b. Abdülkādir, Ahmed b. Satılmış, Hasan b. Bayram, Yusuf b. Abdullah.