Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 861 Hüküm no: 1128 Orijinal metin no: [135b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ovanes v. Naksar’ın, tarlasının tasarruf hakkını İbrahim Ağa b. Ömer Efendi’ye bedeliyle devrettiği Vilâyet-i Anadolu’da Sivas sancağında Eğin kazâsında nefs-i kasaba-i Eğin sâkinlerinden İbrahim Ağa b. Ömer Efendi nâm kimesne meclis-i şer‘-i şerîfde kazâ-i mezbûra tâbi‘ Navril nâm karye ahâlîsinden Ovanes v. Naksar nâm Ermeni muvâcehesinde takrîr-i kelâm ve ta‘bîr ani’l-merâm edip merkūm Ovanes târih-i kitâbdan dört sene mukaddem kazâ-i mezbûr karyelerinden Hızırlık nâm karyede vâki‘ bir tarafdan nehr-i cârî ve bir tarafdan mil-i mâ ve bir tarafdan ( ) ve bir tarafdan ( ) tarlaları ile mahdûd bir kıt‘a tarlasını on üç kıt‘a esedî guruşa sâhib-i arz ma‘rifetiyle bana ferâğ ve teslîm edip ben dahi tefevvuz ve kabûl eyledikden sonra bedel olunup takrîri tahrîr olunmak matlûbumdur dedikde gıbbe’s-suâl merkūm Ovanes cevâbında fi’l-hakīka târih-i kitâbdan dört sene mukaddem kazâ-i mezbûr karyelerinden Hızırlık nâm karyede vâki‘ bir tarafdan nehr-i cârî ve bir tarafdan mil-i mâ ve bir tarafdan ( ) ve bir tarafdan ( ) tarlaları ile mahdûd bir kıt‘a tarlamı sâhib-i arz ma‘rifetiyle on üç kıt‘a esedî guruşa bedel-i makbûza mûmâ-ileyh İbrahim Ağa’ya ferâğ ve tefvîz edip ol dahi tefevvuz ve kabûl eylemişidi deyû bi tav‘ihî ikrâr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: El-Hâc Osman b. Sinan Beşe sâkin-i Balat, Ahmed Beşe b. Mustafa 91. C[emâ‘at], Fahri Çelebi b. Abdullah, Mehmed Bey b. Ramazan, İbrahim Çelebi b. Ramazan.