Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 862 Hüküm no: 1129 Orijinal metin no: [135b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti Hatun’un vakfeylediği evin ulemâdan Zülfikar Efendi’ye tahsis edilmesi Mahmiye-i İstanbul’da Ali Paşa kurbunda Molla Ahaveyn mahallesi ahâlîsinden İmâm Ahmed Efendi b. Ali ve diğer Ahmed Efendi b. Hamza ve Ömer b. Ahmed ve Mehmed b. Ömer ve Fazlı b. Halil ve Seyyid Mustafa Çelebi b. es-Seyyid Ali ve Mustafa b. el-Hâc Halil ve Osman Beşe b. Ömer ve diğer Mustafa nâm kimesneler meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda takrîr-i kelâm ve ta‘bîr ani’l-merâm edip yine mahalle-i mezbûrda vâki‘ Sitti Hâtun nâm sâhibetü’l-hayrın vakf ve süknâsı ulemâdan bir recül-i sâliha her yevm üç İhlâs-ı şerîf tilâvet edip sevâbını rûhuna ihdâ etmek üzre şart eylediği bir tarafı [136a] Mehmed Çavuş mülküne ve bir tarafdan Abdurrahman Ağa mülküne ve bir tarafı Ahmed Ağa mülküne ve taraf-ı râbi‘i Mustafa Beşe mülküne müntehî havluyu ve bir bâb odayı müştemil menzile mutasarrıf olan Abdullah âhar diyâra gidip menzil-i mezbûrda iki hâtun iskân edip iki def‘a menzil-i mezbûru ateş ile îkād edip mahalle-i mezbûreyi ihrâk mertebesine varıp küllî zararları olmağla şart-ı vâkıfe üzre bir müstahıkkına tevcîh olunmasın taleb eder demeleri ile ulemâdan olup süknâya eşedd-i ihtiyâc ile muhtâc olan râfi‘ü’l-kitâb Zülfikār Efendi’ye ber mûceb-i şart-ı vâkıfe tevcîh olunup zabt ve tasarrufu için bu vesîka-i enîka ketb olunup yedine def‘ olundu. Hurrire fi’l-yevmi’t-tâsi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed b. Abdullah, Veli Beşe b. Mahmud, Hasan b. Ahmed, Hasan Beşe b. Abdullah, el-Hâc Sâlih [b.] Selâmi.