Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 862 Hüküm no: 1130 Orijinal metin no: [136a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hocazâde ailesinden Kadı Ahmed Efendi’nin, Mahmud Paşa Vakfı’na ait olup üzerindeki binası yanmış arsa üzerine ev yapma isteği ve yapılacak evin masrafının hesaplanması Sâbıkan Bursa kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il ve’l-me‘âlî metbû‘ü’l-efâzıl ve’l-e‘âlî Ahmed Efendi b. el-merhûm Ebussaid Efendi meclis-i şer‘-i şerîfde takrîr-i kelâm ve ta‘bîr ani’l-merâm edip mahmiye-i İstanbul’da Pîrî Ağa mahallesinde vâki‘ bir tarafdan ba‘zen Sâlih Efendi menzili demekle ma‘rûf menzil ve bir tarafdan ba‘zen Musli Hoca menzili ve bir tarafdan tarîk-i hâs ve bir tarafdan merhûm Mustafa Efendi menzili ve bir tarafdan tarîk-i âm ile mahdûd büyût-ı adîdeyi müştemil arsası Mahmud Paşa vakfı’na mukāta‘a-i kadîmeli binâsı ceddim merhûm ve mağfûrun-leh Hoca Sadeddin Efendi’nin evlâdına ve evlâd-ı evlâdına süknâsı meşrûta vakıf menzil bin yetmiş senesinde muhterik olup arsa üzerinde enkāzdan mâ‘adâ ancak iki ocaklı Bağdâdî matbah ve bir taş oda ve dehliz ve fevkānî ve tahtânî mahzen ve bir harâb ahır kalıp lâkin anların dahi bi’l-külliye harâba işrâfı olup imâret ve meremmet olunmadıkça intifâ‘a salâhiyyeti olmayıp birkaç seneden beri vakıfda müsâ‘ade olmamağla binâ olunmayıp ve meşrûtun-lehüm olanlar dahi ibâ ve imtinâ‘ etmeleriyle ben malım ile ceddim merhûm-ı mezbûrun vakf için mukāta‘a-i zemînden mâ‘adâ yevmî on akçe ücret takdîr ile binâ ve imâret ve masrûfum ücret-i mezbûrdan istîfâ edince tasarruf ba‘dehû şart-ı vâkıf ile amel olunmak üzre istîcâra râgıb olduğunda hâkim-i muvakki‘-i kitâb hazretleri dahi bana vech-i muharrer üzre îcâr ve teslîm etmekle hâlâ savb-ı şer‘den üzerine varılıp nukz-ı mevcûdun kıymeti ve ebniye-i harâbenin mikdâr-ı mâl-ı imâreti takvîm ve tahmîn ve tahrîr olunması matlûbumdur dedikde kıbel-i şer‘den mevlânâ Mehmed Efendi b. Abdülbâkī irsâl olunup ol dahi hâssa mi‘mârlardan üstâd Hüseyin Halîfe b. Abdullah ve zeyl-i rakīmde mektûbü’l-esâmî olan müslimîn ile üzerine varıp ba‘de’l-keşf ve’l-mu‘âyene mi‘mâr-ı mezbûr mesâha eyledikde tûlen ve arzen bi hesâb-ı şatrancî beş bin üç yüz kırk yedi zirâ‘ arsa üzerinde mevcûd olan cümle enkāzın kıymeti ancak yirmi bin akçe ve ol harâbe ahırın hükm-i nukzunda olan binâsının kıymeti yedi bin akçedir ve ol matbah ve kârgîr oda ve mahzenler ve dehliz ve tavan ve döşeme ve cunbalı? pencereleri ile cem‘an yirmi dört bin akçe ile imâret mümkün olur bundan ekal ile olmaz deyû mi‘mâr-ı mezbûr ile müslimîn-i mezkûrîn icmâ‘ ve ittifâk ettiklerini mevlânâ-yı mezbûr mahallinde tahrîr ba‘dehû ma‘an irsâl olunan Hasan b. Bayram ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü’l-müderrisîni’l-kirâm zübdetü’l-muhakkikīni’l-fihâm Mehmed Efendi, mefharü’l-müderrisîni’l-kirâm Ahmed Efendi, umdetü’l-müderrisîni’l-fihâm Kapıcızâde Ahmed Efendi, fahrü’l-akrân Kenan Ağa.