Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 863 Hüküm no: 1131 Orijinal metin no: [136a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bazı zimmîlerin yirmi yedinci bölük neferlerinin vakıf orta akçelerinden ödünç aldıkları Vilâyet-i Anadolu’da kasaba-i Mudanya’ya tâbi‘ Terliye nâm karye ahâlîsinden Kostantin v. Fetakarni ve Panayot v. Kostantin ve Marordi v. Lamberi ve Dimitri v. Preşkova ve Kostantin v. Serol ve Manol v. Karakaş nâm zimmîler meclis-i şer‘-i şerîf-i Ahmedî ve mahfil-i dîn-i münîf-i Muhammedî’de dergâh-ı âlî -dâme mahfûfen bi’l-me‘âlî- yeniçerilerinden yirmi yedinci bölük neferâtının vakıf orta akçelerinin mütevellîsi olan râfi‘ü’l-kitâb İbrahim Çelebi b. Abdülvehhâb nâm kimesne mahzarında her biri ikrâr ve takrîr-i kelâm edip mütevellî-i mezbûr yedinden makbûz vakf-ı mezbûra cihet-i karzdan bin beş yüz esedî guruş ve semeni târih-i kitâbdan üç yüz altmış [gün] tamâmına değin müeccel mütevellî-i mezbûr yedinden müşterâ ve makbûz mor Londrine çukaya kaplı bir samur kürk bahâsından üç yüz esedî guruş cem‘an vakf-ı mezbûra zimmetimizde vâcibü’l-edâ bin sekiz yüz esedî guruş deynimiz olup her birimiz meblağ-ı mezbûrdan âharın zimmetine lâzım gelene emr ve kabûlü hâviye kefâlet ile kefîl olduk dediklerinde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Es-Seyyid Ahmed Efendi [b.] es-Seyyid Mustafa, Mustafa Bey b. Ali Bey, Mustafa Beşe Ser-oda-i on üç, İmâm Mehmed Efendi b. Ramazan, Resul Efendi b. Musa Abdülkādir Efendi b. Yahya el-İmâm, el-Hâc Mehmed b. Abdullah, Çorum Serdârı Hızır Beşe b. ( ), Mehmed Beşe b. Ömer 53. [bölük], Halil b. Veli, Hacı Mehmed b. Sinan.