Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 864 Hüküm no: 1132 Orijinal metin no: [136a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Mehmed’in evini karısı Hatice bt. Abdullah’a hibe ettiği Mahmiye-i İstanbul’da Hatice Sultan mahallesi sükkânından Mustafa Çelebi b. Mehmed tarafından husûs-ı âti’l-beyânı ikrâra vekîl olduğunu Hüseyin Çelebi b. Nasuh ve Ramazan b. Ömer nâm kimesneler şehâdetleriyle sâbit olan Abdi Beşe b. el-Hâc Mehmed nâm kimesne meclis-i şer‘-i şerîf-i lâzımü’t-teşrîfde müvekkil-i mezbûrun zevcesi işbu râfi‘atü’l-kitâb Hatice bt. Abdullah nâm hâtun mahzarında bi’l-vekâle ikrâr ve takrîr-i kelâm edip müvekkilim mezbûr Mustafa Çelebi silk-i mülk-i sahîhimde münselik olup mahalle-i mezbûrda vâki‘ bir tarafdan yine müvekkil-i merkūm mülkü ve iki tarafdan Hüseyin Çelebi b. Ali mülkü ve bir tarafdan tarîk-i hâs ile mahdûd bir bâb tahtânî oda ve bir sofa ve bir tahta-pûş ve kenîf ve havluyu müştemil menzilini zevcesi merkūme Hatice Hâtun’a ba‘de’t-tahliyyeti’ş-şer‘iyye hibe-i sahîha-i şer‘iyye ile hibe ve temlîk ve teslîm edip merkūme Hatice Hâtun’un mülk-i mevhûbu olup müvekkilim merkūm Mustafa Çelebi’nin alâka ve medhali kalmadı dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l[-yevmi’l]-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Abdullah Efendi b. el-İmâm, Feyzullah Efendi el-Müderris, Mehmed Çelebi b. Mustafa, Ahmed Çelebi b. ( ) el-Kâtib, Ramazan Çelebi b. Ömer, Mustafa Çelebi b. Hüsrev.