Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 864 Hüküm no: 1133 Orijinal metin no: [136b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fazıl Ağa b. Seyfullah’ın, Bodur Ahmed Ağa’da kalan alacağını kefil el-Hâc Hüseyin b. Ömer Ağa’dan alıp fazlasını talep edemeyeceği Medîne-i Üsküdar’da Gülfem mahallesi ahâlîsinden bâ‘isü’l-kitâb Fâzıl Ağa b. Seyfullah nâm kimesne meclis-i şer‘-i şerîfde kasab tâifesinden el-Hâc Hüseyin b. Ömer nâm kimesne mahzarında üzerine da‘vâ ve takrîr-i kelâm edip sâbıkan İsmailgeçidi mütevellîsi olup mahmiye-i mezbûrda Ayasofya-i Kebîr mahallesinde sâkin iken bundan akdem vefât eden Bodur Ahmed Ağa zimmetinde karzdan hakkım olan iki bin esedî guruş ile yedimden müşterâ ve makbûz bir kır at bahâsından hakkım olan altı yüz esedî guruş cem‘an mezbûr Ahmed Ağa zimmetinde hakkım olan iki bin altı yüz esedî guruşa müteveffâ-yı mezbûrun hayâtında emri ile mezbûr Hacı Hüseyin ve gāib ani’l-meclis kapıcı Ramazan Bey, Dedemgeldizâde demekle şehîr el-Hâc Mehmed ve Halil Çelebi nâm kimesnelerden her biri başka başka kefîl olduklarından sonra bin üç yüz altmış esedî guruşunu mezbûrlardan ahz u kabz edip bâkī bin iki yüz kırk esedî guruş hakkım zimmetlerinde kalmağın suâl olunup meblağ-ı bâkī-i mezbûr bin iki yüz kırk esedî guruşun kefâlet-i mezbûresine binâen mezbûr Hacı Hüseyin’den alıverilmesi matlûbumdur dedikde, gıbbe’s-suâl mezbûr Hacı Hüseyin cevâbında müdde‘î-i mezbûrun müteveffâ-yı mezbûr zimmetinde ciheteyn-i mezbûreteynden hakkı olan iki bin altı yüz esedî guruşa vech-i mübeyyen üzre kefîl olduğumdan sonra meblağ-ı mezbûr iki bin altı yüz esedî guruşdan müdde‘î-i mezbûrun ahzını i‘tirâf ettiği bin üç yüz altmış esedî guruşdan mâ‘adâ iki yüz seksen beş esedî guruşu dahi müdde‘î-i mezbûra ben nakden edâ ve teslîm ol dahi yedimden ahz u kabz edip ve beş yüz guruşunu dahi müdde‘î-i mezbûrun emri ile müteveffâ-yı mezbûr Ahmed Ağa hayâtında Baklacı demekle ma‘rûf Mehmed Ağa’ya def‘ ve teslîm edip ancak cihet-i mezbûreden müdde‘î-i mezbûra zimmetimde vâcibü’l-edâ dört yüz elli beş esedî guruş deynim bâkī kalmışdır deyû müdde‘î-i mezbûru ba‘zı da‘vâsında def‘le mukābele edicek gıbbe’s-suâl mezbûr Fazlullah cevâbında medyûnum mezbûr Ahmed Ağa kasaba-i mezbûre mütevellîsi iken bana ihdâ etmek için mezbûr Hacı Hüseyin ile irsâl ettiği evsâfı beynimizde ma‘lûm üç re’s gulâmı mezbûr Hacı Hüseyin emrim ile iki yüz seksen beş esedî guruşa âhara bey‘ ve teslîm edip kabz-ı semen ettiğimden sonra semenleri olan meblağ-ı mezbûru bana hibe ve teslîm edip ben dahi ittihâb ve kabz etmişidim ve mezbûr Mehmed Ağa’ya beş yüz esedî guruş verin deyû vech-i muharrer üzre emr eylemişidim, lâkin mezbûrlar beş yüz guruşu emrim üzre mezbûr Mehmed Ağa’ya edâ etmemişlerdir deyicek, gıbbe’s-suâl mezbûr Hacı Hüseyin meblağ-ı mezbûr iki yüz seksen beş guruşunu vech-i muharrer üzre hibe ve teslîm ettiğini inkâr etmeğin mezbûr Hacı Hüseyin meblağ-ı mezbûr iki yüz seksen beş esedî guruşu merkūm Fazlullah Ağa’ya vech-i mübeyyen üzre hibe ve teslîm ettiğine mezbûr Fazlullah Ağa’dan ve mezbûr Hacı Hüseyin’den def‘-i mezbûruna beyyine taleb olundukda mezbûr Fazlullah Ağa ityân-ı beyyineden izhâr-ı acz ile istihlâf etmeğin mezbûr Hacı Hüseyin’e meblağ-ı mezbûr iki yüz seksen beş esedî guruşu merkūm Fazlullah Ağa’ya hibe ve teslîm etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ ettikden sonra medîne-i mezbûrede Bezzâz-ı Cedîd mahallesi sükkânından el-Hâc İsmail b. Hüseyin ve mahrûse-i Galata’ya tâbi‘ kasaba-i Tophâne’de Mehmed Ağa mahallesi sükkânından el-Hâc Hüseyin b. Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Fazlullah Ağa’nın ciheteyn-i mezbûreteynden müteveffâ-yı mezbûr Bodur Ahmed Ağa zimmetinde hakkı olan iki bin altı yüz esedî guruşuna merkūm el-Hâc Hüseyin vech-i mübeyyen üzre kefîl oldukdan sonra müteveffâ-yı mezbûr Ahmed Ağa deyn-i mezbûrun beş yüz esedî guruşunu müdde‘î-i mezbûrun emri üzre müteveffâ-yı merkūm Baklacı Mehmed Ağa’ya bizim huzûrumuzda def‘ ve teslîm edip mezbûr Mehmed Ağa dahi ahz u kabz etmiş idi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mûcebince vech-i mübeyyen üzre deyn-i mezbûr iki bin altı yüz esedî guruşdan bâkī dört yüz elli beş esedî guruşu müdde‘î-i mezbûr Fazlullah Ağa’ya edâya merkūm el-Hâc Hüseyin’e tenbîh olunup ve mezbûr Fazlullah Ağa ziyâde da‘vâsından men‘ olunmağın mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çavuş b. Hüseyin el-Mübâşir, Hasan Çavuş [b.] Abdullah, Mehmed b. Ali, İbrahim b. Ahmed, Diğer Mehmed b. Ali, Ahmed Bey b. Ali, Hasan Beşe b. Mehmed Çukadâr.