Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 866 Hüküm no: 1134 Orijinal metin no: [136b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia’nın, Abdüllatîf b. Mehmed’e verdiğini iddia ettiği para ve eşyaları ispat edemediği Mahmiye-i İstanbul’da Yenibahçe semtinde Çukurçeşme kurbunda sâkine Râbia bt. ( ) nâm hâtun tarafından husûs-ı âti’l-beyâna vekîl olduğu mazmûnu müsbet olup yedinde olan hüccet ile sâbit olan Osman b. Hüseyin nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde bâ‘isü’l-kitâb Abdüllatîf b. Mehmed nâm kimesne mahzarında üzerine da‘vâ ve takrîr-i kelâm edip müvekkilem mezbûre Râbia târih-i kitâbdan bir sene mukaddem sekiz bin akçe ve mecmû‘u beş bin akçe kıymetli üç yorgan ve üç döşek ve dört yastık ve bir sepet sandığı ve altı gömlek ve üç minder ve altı çarşaf ve bir tencere ve altı sahan ve bir kahve tepsisi ve dört fağfurî fincan ve iki fağfurî kâse ve bir fağfurî tabak ve iki ihrâm ve bir kahve ibriğini mezbûr Abdüllatîf’e îdâ‘ ve teslîm edip ol dahi istîdâ‘ ve tesellüm etmişidi, suâl olunup ihkāk-ı hak olunmak matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müvekkile-i mezbûrenin eşyâ-i mezbûresini istîdâ‘ ve kabz etmeyip müvekkile-i mezbûrenin bu cihetle kıbelinde hakkı olmadığına mezbûr Abdüllatîf’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Kıdvetü’l-emâsil ve’l-ekârim İsmail Serçavuşân, Kıdvetü erbâbi’t-tahrîr ve’l-kalem Ebûbekir Efendi Tezkireci-i evvel, umdetü erbâbi’t-tahrîr ve’r-rakam Mustafa Efendi Tezkireci-i sânî, Kıdvetü’l-emâsil ve’l-erkân Eyüb Ağa Kethüdâ-yı hazret-i efendi.