Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 867 Hüküm no: 1135 Orijinal metin no: [136b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Bayezid Vakfı’na ait Darıderesi mukātaasının mahsulünü toplama izni için Mustafa Ağa’nın haksız para aldığı Husûs-ı âti’l-beyânın mahallinde tahrîri iltimâs olunmağın mahmiye-i İstanbul’da vâki‘ Hadîka-i sultâniye kurbunda vâki‘ Yalı Köşkü demekle ma‘rûf köşke varılıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf olundukda hâssa bostancılardan başeski olan fahrü’l-akrân Hasan Bey b. Hüseyin meclis-i ma‘kūd-ı mezbûrda hâlâ bostancıbaşı olan umdetü’l-havâs ve’l-mukarrebîn mu‘temedü’l-mülûk ve’s-selâtîn bâ‘is-i hâze’l-kitâb el-Hâc Mustafa Ağa b. ( ) mahzarında tav‘an ikrâr ve takrîr-i kelâm edip merhûm ve mağfûrun-leh Sultan Bayezid Hân -aleyhi’r-rahmetü ve’l-gufrân- hazretleri evkāfından olup vilâyet-i Rumeli’nde Gümülcine kazâsında vâki‘ Darıderesi mukāta‘asının bin yetmiş senesinde hâsıl olacak mahsûlünü mütevellîsinden iki yük on bin akçeye der-uhde edip zabtı için gitmek murâd ettiğimde mûmâ-ileyh el-Hâc Mustafa Ağa izin akçesi deyû bi gayrı hakkın otuz bin akçemi vilâyet-i mezbûrede Lofça zimmîlerinin cizyesini [123a] iltizâm edip varıp cem‘ etmek için mûmâ-ileyh el-Hâc Mustafa Ağa’dan izin isteğimde mûmâ-ileyh el-Hâc Mustafa Ağa izin akçesi nâmında bi gayrı hakkın altmış bin akçemi min haysi’l-mecmû‘ doksan bin akçemi ahz etmekle meblağ-ı mezbûr doksan bin akçeyi bundan akdem mûmâ-ileyh el-Hâc Mustafa Ağa’dan taleb ve da‘vâ ettiğimde mûmâ-ileyh el-Hâc Mustafa dahi zikr olunan altmış bin akçeyi bana hibe ve teslîm edip ben dahi kabûl ve kabz etmişdim demekle beynimizde nizâ‘-ı küllî vukū‘undan sonra muslihûn tavassut edip mûmâ-ileyh el-Hâc Mustafa Ağa ile beynimizde kırk bin akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr kırk bin akçeyi mûmâ-ileyh el-Hâc Mustafa Ağa yedinden tamâmen ahz u kabz edip husûs-ı mezbûra ve târih-i kitâba gelince mûmâ-ileyh el-Hâc Mustafa Ağa ile beynimizde vâki‘ olan ahz ve i‘tâ ve mu‘âmelât-ı şettâya müte‘allika âmme-i hukūk-ı mu‘âmele ve mechûle da‘vâsından mûmâ-ileyh el-Hâc Mustafa Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d mazmûn-ı kitâba mugāyir mûmâ-ileyh Mustafa Ağa üzerine benden bi’l-asâle veya vekîlimden bi’l-vekâle da‘vâ dahi sudûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem li sene seb‘a ve seb‘în ve elf Şuhûdü’l-hâl: Sâbıkan kireççibaşı olan Osman Bey b. Mehmed, Hüseyin Bey b. Hasan, Halil Bey b. Osman, Mustafa Ağa b. Sinan, Hasan b. Yusuf, Çıkrıkçı? Süleyman Bey b. Mustafa.