Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 868 Hüküm no: 1136 Orijinal metin no: [137a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Girit seferine katılacak gemiler ve kapudanlara mühimmat verilmesi Husûs-ı âti’l-beyânın mahallinde tahrîri iltimâs olunmağın işbu sene-i mübârekede Girit seferi için ihrâcı fermân olunan Donanma-yı hümâyûn gemilerinden mahrûse-i Galata’ya tâbi‘ Beşiktaş İskelesi önünde merbût olan baştarda ta‘bîr olunan sefîneye varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i şerîf olundukda bi’l-fi‘l Tersâne-i âmire emîni olan umdetü’l-emâcid ve’l-ekârim câmi‘ü’l-mehâmid ve’l-mekârim Süleyman Efendi meclis-i ma‘kūd-ı mezbûrda baştarda kapudânı olan Mehmed b. Bayram ve yedek kapudânı olan Mustafa Kapudân ve Tersâne Kethüdâsı İsa Kapudân ve mûmâ-ileyh Tersâne emîni gemisinde kapudân olan Küçük Mehmed ve Kilidî Hüseyin Kapudân ve Hasan Kapudânzâde Mustafa Kapudân ve Lâlbeyzâde Ahmed Kapudân ve Rodosî Mehmed Kapudân ve Abdullah Kapudân ve Abdurrahman Kapudân ve Halil Kapudân ve Derviş Kapudân ve Kefelü Hüseyin Kapudân ve Elvanzâde Mustafa Kapudân ve es-Seyyid Mehmed Kapudân ve Danyal Kapudân ve Kösec Hüseyin Kapudân ve Hamalı Hasan Kapudân ve Mehmed Efendizâde İbrahim Kapudân ve Dedezâde Mustafa Kapudân ve es-Seyyid Haşim Kapudân ve Karacamemizâde Ahmed Kapudân ve Trabluslu Ahmed Kapudân ve Sabancızâde Mehmed Kapudân ve Vez‘a? Mehmed Kapudân ve nev-müslim Ali Kapudân ve kul kâtibi İbrahim Kapudân ve Kara Mehmed Kapudân ve Musli Kapudânzâde Mehmed Kapudân mahzarlarında takrîr-i kelâm ve ta‘bîr ani’l-merâm edip altışar katdan cümle kürekçi ve sâir levâzımını baştarda kapudânı olan mezbûr Mehmed Kapudân’a verdiğin altışar katdan mâ‘adâsı beşer katdan cümle kürekçi ve sâir mühimmâtını yedek kapudânı olan mezbûr Mustafa Kapudân ve beşer katdan on beş ziyâde cümle kürekçi ve sâir mühimmâtını emîn gemisi kapudânı olan mezbûr Küçük Mehmed’e ve bunlardan mâ‘adâsına cümle beşer katdan cemî‘ kürekçi ve sâir mühimmâtlarını tamâmen teslîm edip anlardan her biri dahi tesellüm ve kabz etmişlerdir suâl olunup takrîrleri tahrîr olunmak matlûbumdur dedikde gıbbe’s-suâl mezbûr kapudânlardan her biri kaziyye minvâl-i meşrûh üzre olup ânifen beyân olduğu üzre kendiye teslîm olunan kürekçi ve sâir mühimmâtı tamâmen emîn-i mûmâ-ileyh yedinden ahz u kabz ettiklerini tâyi‘an ikrâr ve i‘tirâf etmeğin mâ vaka‘a bi’t-taleb ketb olundu. Hurrire fi’l-yevmi’r-râbi‘ min Şevvâli’l-mükerrem li sene seb‘a ve seb‘în ve elf Şuhûdü’l-hâl: Düstûr-ı mükerrem müşîr-i müfahham hazret-i kāimmakām Yusuf Paşa, düstûr-ı mükerrem müşîr-i müfahham hazret-i Kapudân Paşa, emîrü’l-ümerâ’i’l-kirâm şıkk-ı evvel defterdârı kāimmakāmı Mehmed Paşa, umdetü’l-emâcid ve’l-a‘yân Osman Paşazâde Mustafa Bey, umdetü erbâbi’t-tahrîr ve’l-kalem Ebûbekir Efendi Tezkireci-i evvel, zübdetü ashâbi’t-tastîr ve’r-rakam tezkireci-i sânî Mustafa Efendi, umdetü’l-a‘yân ve’l-eşbâh muhzır Mustafa Ağa, fahrü’l-akrân ve’l-a‘yân İsmail Ağa Çavuşbaşı, umdetü’l-emâsil ve’l-akrân kapıcılar kethüdâsı Fazlı Ağa.