Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 869 Hüküm no: 1137 Orijinal metin no: [137a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sakine’nin, babası el-Hâc Hüseyin’den kalan dükkân ve evlerin kira hissesini kardeşi Mustafa Çelebi’den talep edip bir kısmını alması gerektiği Mahmiye-i İstanbul’da Seydî Bey mahallesi ahâlîsinden olup bundan akdem vilâyet-i Anadolu’da Ağras kazâsına tâbi‘ İslâmköyü nâm karyede vefât eden el-Hâc Hüseyin b. Ali’nin sulbiye kebîre kızı bâ‘isetü’l-kitâb Sâkine nâm hâtun meclis-i şer‘-i şerîf-i lâzımü’t-teşrîfde karındaşı Mustafa Çelebi mahzarında üzerine da‘vâ ve takrîr-i kelâm edip mezbûr Mustafa Çelebi ile ale’l-iştirâki’s-seviy icâreteyn-i ma‘lûmeteyn ile mutasarrıf olduğumuz beynimizde ma‘lûm bir bakkal dükkânının ve bir fırın ve odaların müste’cirlerinden ve sülüsü benim sülüsânı mezbûr Mustafa Çelebi’nin mülkü olup beynimizde ma‘lûm bir bakkal dükkânı ve bir menzilin müste’cirlerinden emrim ile iki senede mezbûr Mustafa Çelebi benim hissem için on sekiz bin akçe ahz u kabz etmişdir suâl olunup alıverilmek matlûbumdur dedikde gıbbe’s-suâl mezbûr Mustafa Çelebi zikr olunan dükkânlar ve fırın ve menzil ve odaların müste’cirlerinden vech-i muharrer üzre müdde‘iyye-i mezbûrenin hissesi için ancak iki senede on altı bin iki yüz seksen akçe ahz u kabz etmişimdir deyip ziyâdeyi inkâr etmeğin müdde‘iyye-i mezbûreden ziyâde da‘vâsı için beyyine taleb olundukda ityân-ı beyyineden izhâr-ı acz ile istihlâf etmeğin mezbûr Mustafa Çelebi’ye vech-i muharrer üzre zikr olunan iki bakkal dükkânları ve fırın ve menzil ve odaların müste’cirlerinden iki senede müdde‘î-i mezbûrenin emriyle hissesi için on iki bin iki yüz seksen akçeden ziyâde kabz etmeyip bu vechile kıbelinde müdde‘iyye-i mezbûrenin hakkı olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince on iki bin iki yüz seksen akçeyi müdde‘iyye-i mezbûreye teslîme mezbûr Mustafa Çelebi’ye tenbîh olup müdde‘iyye-i mezbûre bilâ-beyyine ziyâde da‘vâsından men‘ olunup bi’t-taleb kayd şüd, fi’t-târihi’l-mezbûr. Şuhûdü’l-hâl: Mehmed Çelebi Kethüdâ-yı muhzırân, İbrahim Beşe b. Mehmed, Baba Resul [b.] Rıdvan, çukadâr Hasan Beşe b. Abdullah ve gayruhüm.