Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 870 Hüküm no: 1138 Orijinal metin no: [137b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Ağa b. Veli’nin, âzatlı kölesi Süleyman b. Abdullah’ın terekesini beytülmâl emîninden alması gerektiği Mahmiye-i İstanbul’da Tahtaminâre mahallesinde sâkin Hüseyin Ağa b. Veli tarafından husûs-ı âti’l-beyâna vekîl olduğu mezbûrun li ebeveyn karındaşı Hasan Ağa ile İbrahim b. Abdullah nâm kimesneler şehâdetleriyle şer‘an sâbit olan Mustafa Çavuş b. Abdullah, meclis-i şer‘-i hatîrde hâlâ mahmiye-i İstanbul’da Gümrük emîni ve kasaba-i Silivri’de bilâ-vâris vefât edenlerin terekesini cânib-i beytülmâl için kabza memûr olan umdetü’l-a‘yân Mahmud Ağa tarafından husûs-ı âti’l-beyâna vekîl-i sâbitü’l-vekâle olan Ebûbekir Ağa b. Abdurrahman mahzarında bi’l-vekâle da‘vâ ve takrîr-i kelâm edip vilâyet-i Rumeli’nde medîne-i Budin’den Mahmiye-i İstanbul’a gelir iken zikr olunan Silivri kasabasında vefât eden Süleyman b. Abdullah müvekkil-i mezbûr Hüseyin Ağa’nın abd-i mu‘takı olup mezbûrun verâseti velâ-i itâka cihetinden müvekkil-i mezbûr Hüseyin Ağa’ya münhasıra iken müvekkil-i mezbûr Mahmud Ağa müteveffâ-yı mezbûrun terekesini bi gayrı hakkın vaz‘-ı yed etmişdir suâl olunup makbûzu olan tereke[nin] bi’l-vekâle alıverilmesi matlûbumdur dedikde gıbbe’s-suâl vekîl-i mezbûr Ebûbekir Ağa cevâbında müvekkil-i mûmâ-ileyh Mahmud Ağa tereke-i müteveffâ-yı mezbûra vaz‘-ı yedini ikrâr, lâkin mezbûrun vech-i meşrûh üzre verâsetini inkâr edicek müdde‘i’l-vekâle olan merkūm Mustafa Çavuş’dan müdde‘âsını mübeyyine beyyine taleb olundukda udûl-i müslimînden olup mahmiye-i mezkûrda Kefeli mahallesinde sâkin Mehmed Çavuş b. Abdi ve zikr olunan Tahtaminâre mahallesinde sâkin İbrahim Beşe b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ medîne-i mezbûreden mahmiye-i mezkûreye gelir iken kasaba-i mezbûrede vefât eden mezbûr Süleyman müvekkil-i mezbûr Hüseyin Ağa’nın abd-i mu‘takı olup mezbûrun verâseti velâ-i itâka cihetinden müvekkil-i mezbûr Hüseyin Ağa’ya münhasıra mezbûrdan gayrı vârisi ve terekesine müstahıkk-ı âhar olduğu ma‘lûmumuz değildir tereke-i müteveffâ-yı mezbûra vâzı‘ü’l-yed olanlardan müvekkil-i mezbûr Hüseyin Ağa için hakk-ı taleb ve ahz vardır biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince mezbûrun verâsetine hükm ve vekîl-i mezbûr Ebûbekir Ağa’ya müvekkil-i mûmâ-ileyh Mahmud Ağa’nın makbûzu olan tereke-i müteveffâ-yı mezbûru vekîl-i merkūm Mustafa Çavuş’a teslîme tenbîh olunmağın mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çavuş b. Hamza el-Mübâşir, Abdi Çelebi b. Hasan, Hasan Çelebi b. Ahmed, Mehmed b. Ramazan.