Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 871 Hüküm no: 1139 Orijinal metin no: [137b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Abdullah’ın, diğer Ahmed Beşe’de kalan alacağını talep ettiği, ziyade talebinin reddolunduğu Mahrûse-i Galata müzâfâtından kasaba-i Beşiktaş’da Sinan Paşa mahallesinde sâkin Ahmed Beşe b. Abdullah mahfil-i kazâda diğer Ahmed Beşe b. Abdullah mahzarında üzerine da‘vâ ve takrîr-i kelâm edip târih-i kitâbdan dört sene mukaddem on beş bin akçe mezbûr Ahmed Beşe’ye ikrâz ve teslîm edip mezbûr Ahmed Beşe dahi iktirâz ve kabz ettikden sonra meblağ-ı mezbûrun iki bin yedi yüz elli akçesini bi’d-defe‘ât bana edâ ve bin iki yüz akçesini emrim ile Kör Dimo’ya ve bin altı yüz akçesini Kasab Mehmed’e ve altı yüz akçesini Kamir nâm zimmîye ve yüz seksen akçesini menzil kirâsı için Ahmed Çelebi nâm kimesneye verip bâkī beş bin dört yüz yetmiş akçe hakkım zimmetinde kalmağın suâl olunup alıverilmek matlûbumdur dedikde gıbbe’s-suâl mezbûr Ahmed Beşe cevâbında müdde‘î-i mezbûr Ahmed Beşe’ye cihet-i mezbûreden zimmetinde hakkı olan on beş bin akçeden vech-i muharrer üzre ahz ve istîfâsını edâ ettiği dokuz bin beş yüz otuz akçeden meblağ-ı mezbûrun beş bin akçesini dahi müdde‘î-i mezbûr Ahmed Beşe zimmetinde yedimden müşterâ ve makbûz süt bahâsından hakkım olan beş bin akçeye takās edip ol dahi mukāssa ve kabûl eyledi ve sekiz yüz akçesini dahi emri ile müdde‘î-i mezbûrun vech-i muharrer üzre mezbûr Kamir’e def‘imi ikrâr ettiği altı yüz akçeden ziyâde deyn-i mezbûrun sekiz yüz akçesini mukābele edicek gıbbe’s-suâl müdde‘î-i mezbûr Ahmed Beşe cevâbında mezbûr diğer Ahmed Beşe’ye süt bahâsından olan beş bin akçeyi tarafına edâ etmişidim deyip mezbûr diğer Ahmed Beşe’nin def‘-i mezbûrunu def‘le mukābele ve mezbûr Kamir’e altı yüz akçeden ziyâde ver deyû emrini inkâr edicek mezbûr diğer Ahmed Beşe’den müdde‘î-i mezbûr merkūm Kamir’e ver deyû emrini i‘tirâf ettiği altı yüz akçeden ziyâde mezbûr Kamir’e sekiz yüz akçe dahi ver deyû merkūm diğer Ahmed Beşe’ye emretmediğine müdde‘î-i mezbûr Ahmed Beşe’ye yemîn teklîf olundukda her biri alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince deyn-i mezbûrdan bâkī dört yüz yetmiş akçeyi müdde‘î-i mezbûra edâya merkūm diğer Ahmed Beşe’ye tenbîh olunup müdde‘î-i mezbûr ziyâde da‘vâsından men‘ olunmağın mâ vaka‘a bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Süleyman Beşe [b.] Mehmed el-Mübâşir, Mehmed Bey b. Abdullah, İbrahim Çelebi b. Ahmed, Mehmed b. Ramazan.